14.04.2025 | 15:35
Սի Ցզինպինը հայտարարել է, որ «առևտրային և մաքսատուրքային պատերազմներում հաղթողներ չեն լինում»
ԱՄՆ-ում Դոնալդ Թրամփի դեմ երկու քրեական գործ է կարճվել
Քաղաքականություն
26.11.2024 | 12:29
ԱՄՆ հատուկ դատախազ Ջեք Սմիթը դատարանին խնդրել է կարճել նորընտիր նախագահ Դոնալդ Թրամփի դեմ հարուցված քրեական գործերը, գրում է DW-ի ռուսական ծառայությունը։
Դատավոր Տանյա Չուտկանին ուղղված հայտարարության մեջ Սմիթը բացատրել է, որ ԱՄՆ Սահմանադրությունը պահանջում է գործը կարճել մինչև ամբաստանյալի երդմնակալությունը։ Նույն օրն ավելի ուշ Չուտկանը պաշտոնապես կարճել է գործը։
Նախընտրական քարոզարշավի ժամանակ Դոնալդ Թրամփը հայտարարել էր, որ Սպիտակ տուն վերադառնալուն պես աշխատանքից կազատի Ջեք Սմիթին։
Ընդհանուր առմամբ, Դոնալդ Թրամփին մեղադրանք է առաջադրվել չորս քրեական գործով։ Նոյեմբերի 25-ին երկու դաշնային գործեր փակվել են. դրանք վերաբերում էին 2020 թվականի ԱՄՆ նախագահական ընտրություններին միջամտելու քաղաքական գործչի փորձին և գաղտնի փաստաթղթերի ոչ պատշաճ պահպանմանը։
Թրամփի դեմ նահանգային մակարդակով ևս երկու գործ է հարուցվել՝ Նյու Յորքում և Ջորջիայում։ Առաջինով նախկին նախագահը մեղադրվում է բիզնես փաստաթղթեր կեղծելու մեջ։ Երդվյալ ատենակալները նրան մեղավոր են ճանաչել, որից հետո նա բողոքարկել է որոշումը, իսկ դատավորը հետաձգել է գործի քննությունը։ Երկրորդ դեպքով Թրամփը մեղադրվում է Ջորջիայում նախագահական ընտրությունների արդյունքների վրա ազդելու փորձի մեջ, որտեղ նա պարտվել էր գործող նախագահ Ջո Բայդենին 2020 թվականին։
Բացի այդ, Դոնալդ Թրամփի դեմ երկու քաղաքացիական գործ է հարուցվել։ Դրանք վերաբերում են 1990-ականների վերջին նախկին լրագրող Ժան Քերոլի նկատմամբ սեռական ոտնձգություններին և նրան զրպարտելուն:
Թարգմանությունը՝ Տաթև Ֆռանգյանի
