16.09.2026 | 16:54
Քաղցրաշենի մանկապարտեզի շենքում օձ է նկատվել․ երեխաներին տարհանել են
G7-ը ցանկանում է կարտել ստեղծել՝ ռուսական նավթի գինը վերահսկելու համար
Քաղաքականություն
20.05.2022 | 22:22
«Մեծ յոթնյակի» (G7) երկրներն անհրաժեշտ են համարում ռուսական նավթի գնորդների կարտել ստեղծել՝ համաշխարհային շուկաներում ռուսական նավթի գնային պոտենցիալ սահմանաչափը որոշելու համար։ Այս մասին հայտնել է The Wall Street Journal-ը՝ վկայակոչելով ԱՄՆ ֆինանսների նախարար Ջանեթ Յելենին։
ԱՄՆ Ֆինանսների նախարարության ղեկավարը կարծում է, որ ռուսական նավթի գնային պոտենցիալ սահմանաչափը կարող է սահմանվել գնորդների կարտելի կողմից։
«Սրա համար պահանջվում է զգալի կարտել, միայն ԵՄ-ն, գուցե, բավարար չլինի»,- ընդգծել է նա։
Մեխանիզմի ստեղծումը, որի շնորհիվ հնարավոր կլինի որոշել, թե ինչպես Չինաստանի կամ Հնդկաստանի նման երկրները կարող են գնել ռուսական նավթը, նոր քայլ կլինի ԱՄՆ-ի և նրա դաշնակիցների ջանքերում՝ թուլացնելու ռուսական տնտեսությունը՝ ի պատասխան Ուկրաինայի դեմ առանց շարժառիթների Ռուսաստանի ագրեսիվ պատերազմի:
Ըստ Յելենի՝ արևմտյան երկրներն ուղիներ են փնտրում՝ նվազեցնելու Ռուսաստանի էներգետիկ եկամուտները՝ առանց համաշխարհային տնտեսության վրա մեծ ծանրաբեռնվածության։
«Նպատակն է պահպանել ռուսական նավթի որոշակի ներհոսքը շուկա՝ համաշխարհային գները զսպելու համար և կանխելու չափազանց բացասական ազդեցությունը»,- ասել է ԱՄՆ ֆինանսների նախարարը։
Միաժամանակ, ըստ նրա, նման նախագծերի քննարկումը դեռ շատ վաղ փուլում է։
«Կարծում եմ՝ շատ մարդկանց, այդ թվում՝ ինձ համար սա գրավիչ է թվում ընդհանուր տնտեսական տեսանկյունից: Իրականում շատ դժվար է նման մեխանիզմի գործարկումը, և այս բոլոր հարցերը դեռ մշակված չեն»,- ասել է Յելենը:
Bloomberg-ի տվյալներով՝ տարեսկզբից Ռուսաստանի նավթային եկամուտներն աճել են 50 տոկոսով։
The Wall Street Journal-ը նշում է, որ Գերմանիայում G7-ի ֆինանսների նախարարների հանդիպմանը, մասնավորապես, քննարկվել է երկրորդական պատժամիջոցների կիրառման հնարավորությունը՝ որպես ռուսական նավթի գնի հնարավոր սահմանաչափի կիրառման միջոց:
Տաթև Ֆռանգյան
