Թրամփը վերադառնում է Սպիտակ տուն․ շնորհավորանքներ՝ սպասումների ու անորոշության ակնարկներով. ՏԵՍԱՆՅՈՒԹ

ԱՄՆ 47-րդ նախագահը կլինի Դոնալդ Թրամփը․ թեև ընտրությունների պաշտոնական վերջնական արդյունքները դեռևս հայտնի չեն, այնուամենայնիվ, ընտրատեղամասերի փակվելուց մի քանի ժամ անց Թրամփը հայտարարեց «քաղաքական հաղթանակի» մասին և իրեն անվանեց Միացյալ Նահանգների 47-րդ նախագահ։

«Մենք պատմություն կերտեցինք»,- հայտարարել է նա Ֆլորիդայի Վեսթ Փալմ Բիչում աջակիցների առջև ելույթի ժամանակ: Նրա խոսքով՝ հանրապետականները տարել են այնպիսի հաղթանակ, ինչպիսին «երկրում չի եղել երբևէ»։

Այս հայտարարությունից շատ չանցած աշխարհի բազմաթիվ երկրների ղեկավարներ, այդ թվում՝ ՀՀ վարչապետ Նիկոլ Փաշինյանը, արդեն շնորհավորել են Դոնալդ Թրամփին ԱՄՆ նախագահի պաշտոնում վերընտրվելու կապակցությամբ։

«Լիահույս եմ, որ Հայաստանի Հանրապետության և Ամերիկայի Միացյալ Նահանգների միջև հարաբերություններում նոր հնարավորություններ կընձեռվեն, հատկապես՝ Հարավային Կովկասում տևական և կայուն խաղաղության հաստատման, տարածաշրջանային տնտեսական և հաղորդակցային ուղիների ապաշրջափակման պարագայում, որի վերաբերյալ ՀՀ Կառավարության առաջարկներն ամբողջացած են «Խաղաղության խաչմերուկ» նախագծում»,- մասնավորապես, ասված է Փաշինյանի ուղերձում:

Ալիևը նույնպես շնորհավորական ուղերձ է հղել՝ հայտարարելով, թե Ադրբեջանը հատուկ նշանակություն է տալիս ԱՄՆ-ի հետ հարաբերությունների համակողմանի զարգացմանը։

Եվրոպացի առաջնորդներից Թրամփին շնորհավորել են Ֆրանսիայի նախագահ Էմանուել Մակրոնը, Մեծ Բրիտանիայի վարչապետ Քիր Սթարմերը, Իտալիայի վարչապետ Ջորջա Մելոնին, Հունգարիայի վարչապետ Վիկտոր Օրբանը, Լեհաստանի նախագահ Անջեյ Դուդան, Սերբիայի նախագահ Ալեքսանդր Վուչիչը և Ավստրիայի կանցլեր Կարլ Նեհամերը։

«ԵՄ-ն և ԱՄՆ-ն ավելին են, քան պարզապես դաշնակիցներ, որոնք միավորում են 800 միլիոն քաղաքացիներին»,- ասել Եվրահանձնաժողովի նախագահ Ուրսուլա ֆոն դեր Լեյենը:

Եվրոպական խորհրդի ղեկավար Շառլ Միշելն էլ նշել է, որ ԵՄ-ն ակնկալում է շարունակել «կառուցողական համագործակցությունը» Միացյալ Նահանգների հետ։

Թրամփին շնորհավորել է նաև Ուկրաինայի նախագահ Վլադիմիր Զելենսկին՝ բարձր  գնահատելով Թրամփի հավատարմությունը համաշխարհային հարցերի վերաբերյալ «խաղաղություն ուժի միջոցով» մոտեցմանը:

«Հենց այս սկզբունքն է, որ իսկապես կարող է մոտեցնել արդար խաղաղությունն Ուկրաինայում։ Հուսով եմ, որ միասին մենք այն կյանքի կկոչենք»,- ասել է նա։

Դոնալդ Թրամփը բազմիցս կասկածի տակ է դրել Ուկրաինային ԱՄՆ-ի օգնության նման ծավալների նպատակահարմարությունը՝ ասելով, որ Եվրոպան պետք է ստանձնի Կիևին աջակցության մեծ մասը: Թրամփը բազմիցս հայտարարել է, որ եթե հաղթի ընտրություններում, որքան հնարավոր է՝ շուտ կդադարեցնի պատերազմը։ Թեև նա կոնկրետ քայլեր չի նկարագրել, Կիևում վախենում են, որ պատերազմը կարող է դադարեցվել Ռուսաստանի պայմաններով։

Բացի այդ, Թրամփը շնորհավորանքներ է ստացել Իսրայելի վարչապետ Բենիամին Նեթանյահուից, Թուրքիայի նախագահ Ռեջեփ Թայիփ Էրդողանից, Վրաստանի վարչապետ Իրակլի Կոբախիձեից։ Ռուսական ԶԼՄ-ների փոխանցմամբ՝ ՌԴ նախագահ Վլադիմիր Պուտինը չի ծրագրում շնորհավորել հանրապետական Դոնալդ Թրամփին հաղթանակի կապակցությամբ։

Մինչ Թրամփը YMCA-ի երգի ներքո պարում է «հաղթական պարը», իսկ նրա կողմնակիցները տոնում են նախագահական ընտրություններում հաղթանակը, Դեմոկրատական կուսակցությունից ԱՄՆ նախագահի թեկնածու Քամալա Հարիսի թիմից հայտարարել են, որ նա այսօր, ինչպես ավելի վաղ եղել է նախատեսված, Հովարդի համալսարանում միջոցառմանը չի դիմի իր կողմնակիցներին, սպասվում է, որ Հարիսը հայտարարությամբ հանդես կգա վաղը:

Մանրամասները՝ տեսանյութում։

Տաթև Ֆռանգյան