14.12.2025 | 16:37
Ֆիշինգը թիվ 1 կիբեռսպառնալիքն է այսօր․ Մխիթար Հայարապետյան
Ժոզեպ Բորելը շնորհավորել է Դոնալդ Թրամփին և հայտարարել ուժեղ Եվրոպա ստեղծելու մասին
Քաղաքականություն
06.11.2024 | 23:22
Եվրամիության դիվանագիտության ղեկավար Ժոզեպ Բորելը ԱՄՆ-ի նորընտիր նախագահ Դոնալդ Թրամփին ուղղված շնորհավորական ուղերձում շարունակական համագործակցության հույս է հայտնել՝ միաժամանակ տեղեկացնելով ուժեղ և ինքնիշխան Եվրոպա կառուցելու ծրագրերի մասին։ «Արմենպրես»-ի հաղորդմամբ՝ Բորելը համապատասխան գրառում է կատարել X ցանցում։«Արտաքին գործերի և անվտանգության ընդհանուր քաղաքականության շրջանակներում Եվրամիությունը ջանք չի խնայի ԱՄՆ-ի հետ ակտիվ հարաբերություններ պահպանելու համար:
Միևնույն ժամանակ, ԵՄ-ն կշարունակի կատարել իր պարտավորությունները տարբեր ոլորտներում՝ սկսած պաշտպանությունից և անվտանգությունից մինչև կլիմայական խնդիրներ, որպեսզի կառուցի ուժեղ և ինքնիշխան Եվրոպա»,- գրել է Բորելը։
Նա նշել է նաև, որ Թրամփի ընտրությունը հետևանքներ կունենա գլոբալ անվտանգության տեսանկյունից մտահոգություն առաջացնող բոլոր տարածաշրջանների համար, ներառյալ Մերձավոր Արևելքը և Ուկրաինան:Ավելի վաղ ԵՄ ներկայացուցիչներից մեկը լրագրողներին հայտնել էր, որ Բրյուսելում բոլորը սպասում են ամերիկյան ընտրությունների արդյունքներին, քանի որ հենց դրանցից է կախված լինելու եվրոպական երկրների կողմից Ուկրաինային հատկացվելիք հետագա աջակցության մակարդակը:
Աղբյուրը չէր բացառել, որ եվրոպական մի շարք երկրներ կարող են վերանայել նման օգնությունը շարունակելու նպատակահարմարության վերաբերյալ իրենց վերաբերմունքը:2020 թվականի նախագահական ընտրություններում Ջո Բայդենի հաղթանակից հետո եվրոպական կառույցների ղեկավարները հայտարարել էին, որ Դեմոկրատական կուսակցությունը ներկայացնող նախագահի օրոք ԱՄՆ-ի և ԵՄ-ի հարաբերությունները կհասնեն գործընկերության նոր մակարդակի: Ընդ որում, Ժոզեպ Բորելը խոստովանել էր, որ ԱՄՆ-ը մինչ այդ ղեկավարած Թրամփի օրոք այդ հարաբերություններում եղել էին որոշակի բարդություններ:
