30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Միջազգային իրավապաշտպան կազմակերպությունները ԵՄ-ին կոչ են արել հասնել Ադրբեջանում քաղբանտարկյալների ազատ արձակմանը COP29-ի ընթացքում
Քաղաքականություն
06.11.2024 | 22:29
17 միջազգային իրավապաշտպան կազմակերպություններ հանդես են եկել համատեղ հայտարարությամբ՝ կոչ անելով ազատ արձակել Ադրբեջանում քաղբանտարկյալներին COP29-ին ընդառաջ։ Նրանք Բաքվում COP29-ին մասնակցող Եվրամիության ղեկավարներին կոչ են արել Ադրբեջանի իշխանությունների առաջ ուղղակիորեն բարձրացնել երկրում քաղբանտարկյալների հարցը և հասնել նրանց ազատ արձակմանը, փոխանցում է Meydan TV-ն։
Հայտարարությունը ստորագրողների թվում են այնպիսի կազմակերպություններ, ինչպիսիք են Amnesty International-ը, Լրագրողների պաշտպանության կոմիտեն, Մամուլի ազատության և ԶԼՄ-ների եվրոպական կենտրոնը, Լրագրողների եվրոպական դաշնությունը, Freedom Now-ն, Human Rights Watch-ը, Նորվեգիայի Հելսինկյան կոմիտե, PEN International, Խոշտանգումների դեմ համաշխարհային կազմակերպությունը։
«Ադրբեջանում մարդու իրավունքների խախտումներ են գրանցվել, իրավիճակը լրջորեն վատթարացել է վերջին երկու տարիների ընթացքում, քանի որ կառավարությունը հետապնդում է անկախ լրատվամիջոցների և քաղաքացիական հասարակության մնացորդներին, այդ թվում՝ իրավապաշտպաններին: Իշխանություններն օգտագործում են քաղաքական դրդապատճառներով ձերբակալություններն ու շինծու քրեական մեղադրանքները, կամայականորեն սահմանափակում հասարակական կազմակերպությունների գործունեությունը: Այս համակարգն արդյունավետորեն խոչընդոտում է անկախ ակտիվիստներին, լրատվամիջոցներին և իրավապաշտպաններին իրենց աշխատանքն օրինականորեն կատարելու հարցում և նրանց խոցելի է դարձնում քրեական հետապնդման համար»,- ասվում է հայտարարության մեջ։
Նշվում է, որ COP29-ին մասնակցող ԵՄ առաջնորդները պետք է ապահովեն քաղբանտարկյալների ազատ արձակումը՝ առաջնահերթություն տալով նրանց, որոնք շտապ բժշկական օգնության կարիք ունեն, հասնել քաղբանտարկյալների և նրանց ընտանիքների հանդիպումների կազմակերպման, հրապարակայնորեն աջակցություն հայտնել անկախ լրատվամիջոցներին և քաղաքացիական հասարակությանը, Ադրբեջանի իշխանություններին կոչ անել անվերապահորեն ազատ արձակել բոլոր ապօրինի ձերբակալվածներին և չեղարկել հասարակական կազմակերպությունների վերաբերյալ ռեպրեսիվ օրենքները։
Թարգմանությունը՝ Էմմա Չոբանյանի
