Թուրքերի մեծամասնությունը դեմ է նոր Սահմանադրությանն ու կողմ արտահերթ ընտրություններին

Թուրքիայում շարունակվող բանավեճերի ֆոնին՝ արդյո՞ք երկրին անհրաժեշտ է նոր Սահմանադրություն, վերջերս անցկացված հարցման արդյունքները ցույց են տալիս, որ թուրք հասարակության մեծամասնությունը դրա անհրաժեշտությունը չի տեսնում, գրում է Bianet-ը։

ORC Research-ի կողմից հոկտեմբերի 27-ից նոյեմբերի 2-ը երկրի 41 նահանգներում 6,500 մարդկանց շրջանում անցկացված հարցումը ցույց է տվել, որ հարցվածների 55,7 տոկոսը դեմ է նոր Սահմանադրությանը, իսկ 20,6 տոկոսը նշել է, որ դա անհրաժեշտ է։ Կարծիք չունեցողների թիվը կազմել է 23,7 տոկոս։

Ինչ վերաբերում է քաղաքական ուժերի ժողովրդականությանը, հարցման արդյունքների համաձայն՝ գլխավոր ընդդիմադիր Ժողովրդահանրապետական կուսակցությունը (CHP) հավաքել է 30,5 տոկոս, իշխող Արդարություն և զարգացում կուսակցության աջակիցների թիվը նույնն է՝ 29,4 տոկոս, իշխող ուժի գործընկեր MHP-ն երրորդ տեղում է՝ 10,5 տոկոսով, չորրորդ հորիզոնականում քրդամետ DEM կուսակցությունն է՝ 7,5 տոկոսով։

Հարցին՝ «ո՞ր թեկնածուին կքվեարկեիք նախագահական ընտրություններում», եթե դրանք անցկացվեին հիմա, առաջին տեղում հայտնվել է Թուրքիայի նախագահ Ռեջեփ Թայիփ Էրդողանը՝ 38,4 տոկոսով, CHP-ից Ստամբուլի ընդդիմադիր քաղաքապետ Էքրեմ Իմամօղլուն 25,3 տոկոսով երկրորդն է, CHP-ից Անկարայի ընդդիմադիր քաղաքապետ Մանսուր Յավաշը՝ 17 տոկոսով երրորդ տեղում։ Հաջորդիվ HDP-ի նախկին համանախագահ Սելահաթթին Դեմիրթաշն է՝ 5,5 տոկոսով։

Արտահերթ ընտրությունների անցկացման մասին հարցին ի պատասխան՝ հարցման մասնակիցների 50,9 տոկոսը կողմ է արտահայտվել, 37,4 տոկոսը՝ դեմ, իսկ 11,7 տոկոսը չի կողմնորոշվել։

Թարգմանությունը՝ Էմմա Չոբանյանի