14.12.2025 | 16:37
Ֆիշինգը թիվ 1 կիբեռսպառնալիքն է այսօր․ Մխիթար Հայարապետյան
Ռուսական էլիտաները գաղտնի շնորհավորանքներ են փոխանցել Թրամփին հաղթանակի կապակցությամբ
Քաղաքականություն
06.11.2024 | 21:31
Ռուսաստանի նախագահ Վլադիմիր Պուտինը, Անվտանգության խորհրդի փոխնախագահ Դմիտրի Մեդվեդևը և ռուսական էլիտայի այլ ներկայացուցիչներ «ծանոթների միջոցով» շնորհավորել են Դոնալդ Թրամփին ԱՄՆ նախագահական ընտրություններում հաղթանակի կապակցությամբ, «Вёрстка»-ին հայտնել են Կրեմլին և խորհրդարանին մոտ կանգնած աղբյուրները։
Պուտինից և Մեդվեդևից բացի՝ Թրամփին շնորհավորանքներ են փոխանցել Սբերբանկի խորհրդի նախագահ Գերման Գրեֆը, Դաշնային խորհրդի խոսնակ Վալենտինա Մատվիենկոն և Պետդումայի նախագահ Վյաչեսլավ Վոլոդինը։ Լրատվականի զրուցակցի խոսքով՝ Ռուսաստանի իշխանությունները հույս ունեն, որ Թրամփի շնորհիվ Մոսկվայի դիրքերը կբարելավվեն Ուկրաինայի հետ պատերազմում։
«Հույսերը կապված են, առաջին հերթին, «հատուկ գործողության» ընթացքում Ուկրաինային տրամադրվող օգնության կրճատման հետ։ Եվ Թրամփը, իհարկե, մեզ համար շատ ավելի հարմար է պայմանավորվելու համար և ավելի լավը, քան Հարիսը»,- ասել է խորհրդարանում աղբյուրը։
Միաժամանակ, Կրեմլում լուրջ չեն ընդունել Ռուսաստանի և Ուկրաինայի միջև պատերազմը 24 ժամում ավարտելու՝ Թրամփի գաղափարը։
«Եվ ի՞նչ մեթոդներով է դա անելու։ Նա կսպառնա Պուտինի՞ն․․․ Զելենսկիի՞ն։ Պատերազմն արագ ավարտելու միայն մեկ ճանապարհ կա՝ կտրուկ դադարեցնել օգնությունն Ուկրաինային»,- ասել է ՌԴ նախագահի աշխատակազմին մոտ կանգնած աղբյուրը։
Թարգմանությունը՝ Տաթև Ֆռանգյանի
