15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
ՆԱՏՕ-ի շրջանակում հանդիպմանը Չավուշօղլուն ձայնը բարձրացրել է Շվեդիայի ԱԳ նախարար Անն Լինդեի վրա․ Reuters
Քաղաքականություն
19.05.2022 | 15:20
Երբ Ֆինլանդիան և Շվեդիան ազդարարեցին, որ մտածում են ՆԱՏՕ-ին միանալու պատմական որոշում կայացնելու մասին, դաշինքն ակնկալում էր կոշտ պատասխան Մոսկվայից, այլ ոչ թե իր ներսից, գրում է Reuters գործակալությունը։
Նշվում է, որ շաբաթ օրը ՆԱՏՕ-ի արտգործնախարարների հավաքին իրենց ֆինն և շվեդ գործընկերների հետ եվրոպական անվտանգության ոլորտում վերջին տասնամյակների ամենամեծ փոփոխությունը նշելիս Թուրքիայի ներկայացուցիչը մթագնել է ընդհանուր տրամադրությունը։
ՆԱՏՕ-ի մի դիվանագետ Բեռլինում հանդիպման մասին լրատվամիջոցին ասել է, որ Թուրքիայի ԱԳ նախարար Մևլութ Չավուշօղլուն եղել է «ճգնաժամային ռեժիմում»։ Հանդիպումից մեկ օր առաջ էլ Թուրքիայի նախագահ Ռեջեփ Թայիփ Էրդողանն ասել էր, որ Անկարան չի աջակցի ՆԱՏՕ-ին Ֆինլանդիայի և Շվեդիայի անդամակցությանը։
Լրատվամիջոցը գրում է, որ Չավուշօղլուն ոչ միայն անդամակցությունն ընդունելու համար Թուրքիայի պայմաններն է առաջ քաշել, այլև ձայնը բարձրացրել է Շվեդիայի ԱԳ նախարար Անն Լինդեի վրա, որը, ըստ ՆԱՏՕ-ի երեք դիվանագետի, «կանոնակարգի ամոթալի խախտում է»։
«Մեզ համար դա պատմական պահ էր, սակայն, այնուամենայնիվ, Չավուշօղլուն ասաց, որ նյարդայնացած է Լինդեի «ֆեմինիստական քաղաքականությունից», որն այնքան շատ դրամա է բերել»,- ասել է ՆԱՏՕ-ի մեկ այլ դիվանագետ՝ նկարագրելով շատ լարված մթնոլորտը։
«Մենք փորձում էինք հասկանալ, թե մեր թուրք գործընկերն ի՞նչ է ուզում, իսկապես՝ ի՞նչ է ուզում։ Ամոթալի էր»,- ասել է ևս մեկ դիվանագետ անանունության պայմանով։
Թուրքական դիվանագիտական աղբյուրն էլ հայտնել է, որ Չավուշօղլուն հարգանքով է ուրվագծել Թուրքիայի դիրքորոշումը՝ հերքելով Լինդեի մեղադրանքն այն մասին, որ դեմ լինելը պայմանավորված է Շվեդիայի ֆեմինիստական արտաքին քաղաքականությամբ:
«Նրա մեկնաբանությունները չեն օգնում ՆԱՏՕ-ին Շվեդիայի անդամակցելուն, մինչդեռ Ֆինլանդիայից հնչող հայտարարությունները խնամքով մշակված են»,- ասել է աղբյուրը:
Շվեդիայի ԱԳՆ-ն դեռևս չի պատասխանել լրատվամիջոց հարցմանը։
Էմմա Չոբանյան
