06.10.2026 | 17:14
Նովակ Ջոկովիչը տիտղոս նվաճեց մի մրցաշարում, որտեղ երբեք չի պարտվել. ՏԵՍԱՆՅՈՒԹ
Արթուր Պողոսյանը՝ Փաշինյանի հետ հանդիպելու և ՔԿ նախագահ նշանակվելու հավանականության մասին
Քաղաքականություն
26.11.2024 | 16:24
Գլխավոր դատախազի տեղակալ Արթուր Պողոսյանը Factor.am-ի հետ զրույցում չհստակեցրեց, ի վերջո, նշանակվելո՞ւ է ՀՀ Քննչական կոմիտեի նախագահ, թե՝ ոչ։ «Այս պահին այլ տեղեկություն չեմ կարող տալ։ Ինչ որ հայտարարվել է, սահմանափակվենք դրանով։ Երբ կլինի նշանակում, դուք կիրազեկվեք»,- Factor.am-ի հետ զրույցում ասաց Պողոսյանը։
Հիշեցնենք՝ Նիկոլ Փաշինյանը նախորդ շաբաթ Հանրային ՀԸ-ին տված հարցազրույցում հաստատել էր, որ պատրաստվում է Արթուր Պողոսյանի թեկնածությունն առաջադրել ՔԿ նախագահի պաշտոնում։
Այս հայտարարությունից հետո մամուլը գրեց, որ Փաշինյանն ու Պողոսյանը հանդիպել են։ «Ես ո՛չ հանդիպումը կարող եմ հաստատել, ո՛չ էլ նշանակման հետ կապված որևէ մեկնաբանություն կարող եմ տալ»,- ասաց նա։
Հարցին՝ քննարկումից հետո ի՞նչ եզրահանգման են եկել, պատասխանեց․ «Ոչ մի բան չեմ կարող ասել եզրահանգման մասով»։ Այսպիսով, Արթուր Պողոսյանը, ըստ էության, հաստատեց, որ Փաշինյանի հետ քննարկում եղել է։
Նշենք, որ ՔԿ նախագահի պաշտոնը թափուր է շուրջ 10 օր, երբ մի շարք բարձրաստիճան պաշտոնյաների հետ միասին՝ հրաժարական ներկայացրեց նաև Քննչական կոմիտեն ղեկավարող Արգիշտի Քյարամյանը։
Նարեկ Կիրակոսյան
