12.03.2026 | 09:53
ՀՀ տարածքում ավտոճանապարհները հիմնականում անցանելի են
Քյարամյանի մտերիմը` ՔԿ նախագահ. ո՞վ է Արթուր Պողոսյանը
Քաղաքականություն
23.11.2024 | 10:19
Նիկոլ Փաշինյանը Արթուր Պողոսյանին առաջադրելու է Քննչական կոմիտեի նախագահի պաշտոնում։ Այս մասին Հայաստանի վարչապետը հայտարարեց Հանրային ՀԸ-ին տված հարցազրույցում։
Նշենք, որ ՔԿ նախագահը նշանակվում է ՀՀ կառավարության որոշմամբ։ Այս պաշտոնը թափուր է արդեն մեկ շաբաթ, երբ Փաշինյանի՝ SMS-ով հայտնած խնդրանքից հետո, ի թիվս այլ պաշտոնյաների, հրաժարականի դիմում գրեց նաև Արգիշտի Քյարամյանը։
Արթուր Պողոսյանն այս պահին գլխավոր դատախազի տեղակալն է։ Նա այս պաշտոնին է նշանակվել 2022 թվականին։ Մինչ այդ նա զինվորական դատախազի տեղակալն էր, իսկ 2020-ին, երբ ԱԱԾ տնօրեն նշանակվեց Արգիշտի Քյարամյանը, մի քանի օր անց նա Պողոսյանին քննչական դեպարտամենտի պետ նշանակեց։
Արթուր Պողոսյանը Արգիշտի Քյարամյանի հետ մտերիմ հարաբերություններ ունի։ Դեռ 2020 թվականին Factor.am-ը գրել էր, որ նրանք ընկերներ են։ Արթուր Պողոսյանն այդ ժամանակ Factor.am-ի հարցին ի պատասխան ասել էր.
«Ես շատ մարդկանց եմ ճանաչում: Եթե Դատախազությունում ինչ-որ մեկն աշխատել է, նշանակում է, որ շատ լավ ճանաչում ենք և շատ լավ հարաբերություններ ունենք: Դա զարմանալու չէ: Եթե ճանաչում եմ, ապա շփվում եմ և մտերմություն եմ անում»։
Քյարամյանի հետ կապված էլ շրջանառվում է, որ նա կնշանակվի Պետական վերահսկողության ծառայության պետ։ Նա այդ պաշտոնին էր նաև 2019-ին` պետի պարտականությունները կատարողի կարգավիճակով։
Նարեկ Կիրակոսյան
