Քաղաքականություն
08.04.2022 | 12:40«Պայմանավորվածություն կա մինչև ապրիլի վերջ ստեղծել դելիմիտացիայի և դեմարկացիայի հանձնաժողով, սակայն վստահ չեմ, որ դա կիրականանա»,- այս մասին «Առանց Արցախի և ԵԱՀԿ Մինսկի խմբի. ի՞նչ են կանխորոշում բրյուսելյան բանակցությունները» թեմայով քննարկման ժամանակ նշեց քաղաքագետ Բենիամին Պողոսյանը:
«Եթե հիշում եք՝ 2021թ. նոյեմբերի 26-ին Մոսկվայում կայացած հանդիպումից հետո ՌԴ նախագահը հայտարարեց, որ ձեռք են բերվել պայմանավորվածություններ՝ մինչև դեկտեմբերի վերջ պետք է ֆիքսվեն դելիմիտացիայի մեխանիզմները: Այդ վերջնաժամկետից 3 ամիս անցել է, և ոչ մի մեխանիզմ ֆիքսված չէ: Եվ ես չեմ զարմանա, եթե մինչև ապրիլի վերջ այդ երկկողմ հանձնաժողովը չձևավորվի»,- նշեց քաղաքագետը:
Պողոսյանը, խոսելով խաղաղության համաձայնագրի մասին, նշեց, որ պետք է զգույշ լինել, քանի որ այդպիսի համաձայնագրեր կնքվում են այն պետությունների միջև, որոնք ֆորմալ առումով գտվել են միմյանց դեմ պատերազմի մեջ, մինչդեռ Ադրբեջանը և Հայաստանը երբևէ միմյանց պատերազմ չեն հայտարարել: Եթե ՀՀ-ն հայտարարում է, որ պատրաստ է Ադրբեջանի հետ կնքել խաղաղության համաձայնագիր, նշանակում է, որ մենք ընդունում ենք, որ Հայաստանը եղել է Ադրբեջանի դեմ պատերազմի մեջ: Իսկ այդ դեպքում, 1988թ. սկսած՝ արցախյան կոնցեպտը, որ դա ինքնորոշման խնդիր է և ոչ տարածքային վեճ Հայաստանի և Արբեջանի միջև, կարող է փլուզվել:
Դժվար է պատկերացել, թե այս բանակցությունների արդյունքում կստորագրվի խաղաղության համաձայնագիր Հայաստանի և Ադրբեջանի միջև, որտեղ կֆիքսվի, որ Արցախի Հանրապետությունը, թեկուզ 3 հազար քառ. կմ սահմաներով, անկախ պետություն է. սա չի կարող լինել:
ՀՀ իշխանությունը պետք է նաև միջազգային իրավունքի տեսակետից դիտարկի՝ արդյո՞ք ճիշտ է խոսել ՀՀ-Ադրբեջան խաղաղության համաձայնագրի մասին:
Այն, որ սահմաների դեմարկացիա, դելիմիտացիա պետք է լինի, դա որևէ մեկը կասկածի տակ չի դնում, սակայն չկա պարտադրանք, որ կնքվի խաղաղության համաձայնագիր»,- նշեց Պողոսյանը:
Մանրամասները՝ տեսանյութում:
