Երևանում հնարավոր չէ՞ պայքարել «զոռբաների» դեմ. նախկին քաղաքապետ Ռոբերտ Նազարյանն անկեղծանում է

Հանրային ծառայությունները կարգավորող հանձնաժողովի նախագահ Ռոբերտ Նազարյանը 2001-2003 թթ. ղեկավարել է Երևան քաղաքը: «Factor TV»-ի հետ հարցազրույցում Երևանի նախկին քաղաքապետն անկեղծանում է, որ չի հաջողել քաղաքի զոռբաների դեմ պայքարում. «Իմ մոտ շատ դեպքերում պայքարը ապօրինի շինարարության դեմ լավ չէր ստացվում: Ես դա միշտ եմ ասել, և նախագիծը հաստատելուց հետո որոշ զոռբաներ շեղումներով էին կառուցում, այն էլ ոչ թե չնչին, այլ մեծ շեղումներով: Իմ պայքարը հաջողության երբեմն չէր բերում: Էդ առումով ես համարում եմ, որ թերացել եմ»:

Ռոբերտ Նազարյանը դժվարանում է գնահատել՝ քաղաքապետ Տարոն Մարգարյանին հաջողվո՞ւմ է պայքարել զոռբաների դեմ, թե՞ ոչ, քանի որ «տեղեկություն չունի», սակայն քաղաքում առաջընթաց տեսնում է:

2002 թ-ին Երևանի քաղաքապետ Ռոբերտ Նազարյանը նախկին նախագահ Ռոբերտ Քոչարյանի հետ Հյուսիսային պողոտայի հիմնարկեքն արեց: Պողոտայի կառուցման արդյունքում քաղաքի կենտրոնի շատ բնակիչներ զրկվեցին իրենց տներից, որոշներն իրենց իրավունքների համար պայքարում հասան մինչև ՄԻԵԴ: Ռոբերտ Նազարյանը, սակայն վստահեցնում է, որ իր պաշտոնավարման շրջանում կնքված պայմանագրերով որևէ քաղաքացի չի տուժել:

«Եթե այդ բնակիչներից որևէ մեկը կասի, որ դժգոհ է մնացել, ես պատրաստ եմ անձամբ ներողություն խնդրել տվյալ բնակչից»,- հայտարարում է Նազարյանը՝ հավելելով. «Ինձանից հետո է եղել, իմ օրոք չի եղել: Ես բոլորի հանդեպ եղել եմ արդար և մի փոքր էլ շատ, քան օրենքի տառն ու ստորակետն էին պահանջում: Որևէ մեկը չի տուժել, շահել է, բայց չի տուժել»:

Դիտեք «Factor TV-»-ի հարցազրույցը: