«Սասնա Ծռեր»-ի գործը Վճռաբեկ դատարանը վերադարձրել է

Վճռաբեկ դատարանը որոշում է կայացրել հետ ուղարկել «Սասնա Ծռեր»-ի 10 անդամի մասով ուղարկված բողոքները՝ պատճառաբանելով, թե կցված չեն բողոքի պատճենը դատավարության բոլոր մասնակիցներին՝ տուժողներին, տուժողների իրավահաջորդներին, տուժողների իրավահաջորդների ներկայացուցիչներին, ամբաստանյալներին և պաշտպաններին ուղարկված լինելը հավաստող փաստաթղթերը։ Այս մասին Factor.am-ը տեղեկանում է «Դատալեքս» դատական-տեղեկատվական համակարգից։

Ըստ որոշման՝ վճռաբեկ բողոքներով պահպանված չեն ՀՀ քրեական դատավարության օրենսգրքի 407-րդ հոդվածի 21-րդ մասի պահանջները, ուստի դրանք ենթակա են վերադարձման: Այս հիմքով դատարանը վերադարձրել է Վարուժան Ավետիսյանի, Սեդրակ Նազարյանի, Մխիթար Ավետիսյանի, Էդվարդ Գրիգորյանի, Գագիկ Եզիազարյանի, Սմբատ Բարսեղյանի, Արեգ Կյուրեղյանի և Արայիկ Եզնիկի Խանդոյանի իրավահաջորդ Անուշ Հայրապետյանի ներկայացուցչի ներկայացրած վճռաբեկ բողոքը։ Պաշտպանական կողմը 10 օր ժամանակ ունի բողոքների սխալները շտկելու և դրանք կրկին ներկայացնելու համար։

Հիշեցնենք՝ նախորդ տարվա փետրվարի 24-ին Երևան քաղաքի ընդհանուր իրավասության դատարանը՝ դատավոր Մեսրոպ Մակյանի նախագահությամբ, վճռել էր «Սասնա Ծռեր» խմբավորման անդամներ Պավել Մանուկյանին և Սեդրակ Նազարյանին դատապարտել 10, Վարուժան Ավետիսյանին, Մխիթար Ավետիսյանին, Գագիկ Եղիազարյանին, Արմեն Բիլյանին և Արեգ Կյուրեղյանին 9 տարի 6-ական ամսվա, իսկ Էդվարդ Գրիգորյանին՝ 8 տարի 6 ամսվա ազատազրկման։ Արայիկ Խանդոյանի նկատմամբ քրեական հետապնդումը դադարեցվել էր մահվան հիմքով։ Իսկ Սմբատ Բարսեղյանը դատապարտվել էր 25 տարվա ազատազրկման՝ մեղավոր ճանաչվելով երկու ոստիկանի սպանության համար։ Մեղադրողը միջնորդել էր երկու ոստիկանի սպանության մեջ մեղադրվող Սմբատ Բարսեղյանին դատապարտել ցմահ, իսկ Արմեն Բիլյանին 21 տարվա ազատազրկման։

Վերաքննիչ դատարանը նախորդ տարվա դեկտեմբերի 10-ին մասնակի բավարարել էր մեղադրող կողմի բողոքը և Արմեն Բիլյանին դատապարտել 25 տարվա ազատազրկման։

Ռոզա Վարդանյան