14.09.2026 | 10:21
Ուկրաինական ԱԹՍ-ները հարձակվել են Կրասնոդարի երկրամասի վրա․ Սոչիում հինգ մարդ է վիրավորվել
Չավուշօղլուն հայտնել է, որ Անթալիայում ցանկացել է ՀՀ-ի և Ադրբեջանի ԱԳ նախարարների հետ եռակողմ հանդիպում կազմակերպել
Քաղաքականություն
31.03.2022 | 13:28
Թուրքիայի ԱԳ նախարար Մևլութ Չավուշօղլուն A Haber-ին տված հարցազրույցում անդրադարձել է Հայաստանի հետ հարաբերությունների կարգավորման թեմային, փոխանցում է Sabah-ը։
Նրա խոսքով՝ կարևոր է, որ «հայ-թուրքական հարաբերությունների կարգավորման գործընթացին աջակցում է Ադրբեջանը»։ Չավուշօղլուն նաև նշել է, որ Թուրքիան արմատական քայլեր չի անում առանց Ադրբեջանի հետ խորհրդակցելու։
«Պատերազմն ավարտված է, պետք է դասեր քաղել։ Պետք է քայլեր ձեռնարկել Կովկասի կայունության համար։ Ե՛վ մենք, և՛ Ադրբեջանը բացում ենք մեր սահմանները, բարելավվում են նաև հարաբերությունները Հայաստանի հետ»,- ասել է Չավուշօղլուն։
Թուրք պաշտոնյան հիշեցրել է, որ «դրական մեսիջներից բացի»՝ նաև հատուկ ներկայացուցիչներ են նշանակվել, երկու անգամ արդեն հանդիպում է տեղի ունեցել։
«Մենք քայլեր ենք ձեռնարկել վստահությունը բարձրացնելու համար։ Չվերթները սկսվել են, կան նաև քաղաքական շփումներ։ Հայաստանի ԱԳ նախարարը Անթալիայի դիվանագիտական ֆորումին էր ժամանել։ Ես ցանկանում էի, որ երեքով (Հայաստանի, Ադրբեջանի և Թուրքիայի ԱԳ նախարարները) հանդիպենք, սակայն Անթալիայում դա տեղի չունեցավ»,- ասել է Չավուշօղլուն։
Էմմա Չոբանյան
