ԱԱԾ աշխատակիցը սպառնում է բողոքի ակցիայի ռուս մասնակիցներին․ ՀՔԱՎ-ը հաղորդում է տվել դատախազություն․ ՏԵՍԱՆՅՈՒԹ

Օրեր առաջ E-press լրատվամիջոցում հրապարակված տեսանյութը վրդովմունքի ալիք է բարձրացրել իրավապաշտպանների շրջանում։ Կադրերում երևում է, թե ինչպես են Ազգային անվտանգության ծառայության աշխատակիցներն ու ոստիկանները մոտենում Ռուսաստանի Դաշնության դեսպանատան դիմաց խաղաղ հավաք իրականացնող ակցիայի օտարերկրացի մասնակիցներին և պահանջում ներկայացնել անձը հաստատող փաստաթուղթ կամ լքել տարածքը՝ սպառնալով, որ հակառակ դեպքում բոլորը բերման կենթարկվեն ոստիկանության բաժին։

Հավաքի մասնակիցներից մեկի անձնագիրը, այնուամենայնիվ, հայտնվում է ոստիկանների ձեռքին։ ԱԱԾ աշխատակիցը բացահայտ վերցնում է անձնագիրը, լուսանկարում այն և սպառնում անձը բացահայտելուց հետո այդ տվյալները փոխանցել Ռուսաստանի Դաշնության դեսպանատուն, որպեսզի «այնտեղ իմանան, թե ինչով են զբաղված իրենց քաղաքացիները ՀՀ-ում»։ Այնինչ, մասնակիցները պարզապես «NOT WAR», «НЕТ путинской ВОЙНЕ» և նմանատիպ գրառումներով պաստառներով իրենց դժգոհությունն էին արտահայտում Ուկրաինայի դեմ Ռուսաստանի սանձազերծած պատերազմի նկատմամբ, քանի որ դրա հետևանքով հազարավոր խաղաղ բնակիչներ են զոհվում։

Տեսանյութն ավարտվում է գրեթե նույնաբովանդակ զրույցով․ դեսպանատան շենքին մոտեցած ոստիկանը հավաքի մեկ այլ մասնակցից անձնագիր է պահանջում՝ բերման ենթարկելու սպառնալիքով, վերցնում անձնագիրը, լուսանկարում, բայց այս դեպքում խոստանում է Ռուսաստանի դեսպանատուն չփոխանցել։

Հավաքի ողջ ընթացքում ոստիկանության և ԱԱԾ-ի ծառայողները իրավական տեսանկյունից չհիմնավորված պահանջներ են ներկայացնում ակցիայի մասնակիցներին։ Մասնավորապես, նրանք պարբերաբար կրկնում են, որ չեն կարող հավաք իրականացնել, քանի որ այլ երկրի քաղաքացիներ են։

Այնինչ, համաձայն Սահմանադրության, «Հավաքների ազատության մասին» օրենքի և Հայաստանի վավերացրած «Մարդու իրավունքների և հիմնարար ազատությունների պաշտպանության մասին» եվրոպական կոնվենցիայի՝ հանրապետությունում յուրաքանչյուր ոք ունի խաղաղ հավաքների ազատության, հավաքներին մասնակցելու իրավունք, նրանց թվում են Հայաստանի Հանրապետության քաղաքացիները, օտարերկրյա քաղաքացիները և քաղաքացիություն չունեցող անձինք:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի խոսքով՝ այս անհարկի միջամտությամբ և անհիմն պահանջներով ոստիկանները խոչընդոտել են ակցիայի մասնակիցների՝ խաղաղ հավաքներ անցկացնելու իրավունքը։

Մանրամասները՝ տեսանյութում։

Ռոզա Վարդանյան