Էրդողանին չի հաջողվել Բրյուսելում հանդիպել Ջո Բայդենի հետ

Թուրքիայի նախագահ Ռեջեփ Թայիփ Էրդողանը նախօրեին Բրյուսելում ՆԱՏՕ-ի գագաթնաժողովի շրջանակում այդպես էլ չի հանդիպել ԱՄՆ նախագահ Ջո Բայդենին, չնայած հանդիպման մասին նախապես հայտարարվել էր։

Al-monitor-ը գրում է, որ հանդիպման չկայանալու հիմնական պատճառը Բայդենի հագեցած գրաֆիկն է։ Լրատվամիջոցները, իրենց աղբյուրներին վկայակոչելով, հայտնում են, որ թուրք պաշտոնյաները և Անկարայում ԱՄՆ դեսպանատունը մեծ ջանքեր են գործադրել հանդիպման համար, թեկուզ գագաթնաժողովի կուլիսներում։

Միաժամանակ, նշվում է, որ հանդիպման ձախողման իրական պատճառն այն է, որ Թուրքիան հրաժարվում է ազատվել իր զինանոցում առկա ռուսական С-400 համակարգերից, որոնք, ըստ ԱՄՆ-ի, սպառնում են ՆԱՏՕ-ի անվտանգությանը։

Թուրքիան այդ համակարգերը ձեռք է բերել՝ չնայած համաձայնագիրը չեղարկելու հարցով ԱՄՆ-ի անդադար ճնշումներին։ Կոնգրեսի մի շարք պատժամիջոցները և երկրի հեռացումը F-35 հարվածային կործանիչների համատեղ ծրագրից չեն ազդել Անկարայի վրա:

Ուկրաինական ճգնաժամը դիտվում էր որպես հնարավոր հարթակ, երբ ԱՄՆ պաշտոնյաները, ըստ տեղեկությունների, առաջ քաշեցին Թուրքիայի կողմից համակարգերն Ուկրաինա տեղափոխելու գաղափարը: Թուրքիան անդրդվելի է՝ հայտարարելով, որ կպահպանի C-400-ները:

Այս ուղերձը պարզ դարձավ նաև Էրդողանի հաղորդակցության գծով տնօրեն Ֆահրեթին Ալթունի գրած հոդվածում, որը հրապարակվել է Wall Street Journal-ում։ Ալթունն «անիրատեսական գաղափար» է անվանել C-400-ների փոխանցումն Ուկրաինային՝ պատժամիջոցների թուլացման դիմաց։ Նա նաև նշել է, որ Արևմուտքի, և հատկապես Միացյալ Նահանգների պարտականությունն է կարգավորել հարաբերությունները Անկարայի հետ «առանց նախապայմանների»:

Հավելենք, որ նախօրեին Էրդողանը մի շարք երկկողմ հանդիպումներ է ունեցել, այդ թվում՝ Մեծ Բրիտանիայի վարչապետի և Ֆրանսիայի նախագահի հետ։

Էմմա Չոբանյան