26.11.2024 | 22:40
ՌԴ ՊՆ-ն Կուրսկի շրջանում ընկած ամերիկյան ATACMS-ի բեկորներ է ցուցադրել
G7-ի ղեկավարները կոչ են արել միջազգային կազմակերպություններին վերանայել Ռուսաստանի հետ հարաբերությունները
Քաղաքականություն
25.03.2022 | 13:30
Արևմուտքի յոթ առաջատար արդյունաբերական երկրների («Մեծ յոթնյակ», G7) առաջնորդները Ուկրաինայի դեմ Ռուսաստանի սանձազերծած պատերազմի ֆոնին կոչ են արել բոլոր միջազգային կազմակերպություններին՝ վերանայել իրենց հարաբերությունները Մոսկվայի հետ, գրում է DW-ի ռուսական ծառայությունը։
«Միջազգային կազմակերպությունները և բազմակողմ ֆորումները չպետք է շարունակեն իրենց հարաբերությունները Ռուսաստանի հետ՝ այնպես, կարծես ոչինչ տեղի չի ունեցել»,- ասվում է G7-ի հայտարարության մեջ, որը հրապարակվել է հինգշաբթի Բրյուսելում տեղի ունեցած ճգնաժամային գագաթնաժողովից հետո:
«Մեծ յոթնյակի» երկրները կոչ են արել ՌԴ նախագահ Վլադիմիր Պուտինին անհապաղ դադարեցնել Ուկրաինայի դեմ ագրեսիան՝ սպառնալով Կրեմլի համար աննախադեպ հետևանքներով՝ պատերազմի համար, որը շարունակվում է արդեն մեկ ամիս։
«Մենք անխոնջ աշխատելու ենք նախագահ Պուտինին, այս ագրեսիան ծրագրավորողներին և աջակցողներին, ներառյալ Բելառուսում Լուկաշենկոյի ռեժիմը, պատասխանատվության ենթարկելու իրենց գործողությունների համար»,- նշել են G7-ի առաջնորդները:
Նրանք Ռուսաստանից պահանջել են դուրս բերել զորքերը և զինտեխնիկան Ուկրաինայի ողջ ինքնիշխան տարածքից։ Միաժամանակ, G7-ը կոչ է արել բոլոր երկրներին, առաջին հերթին՝ Չինաստանին, Ռուսաստանին ոչ մի աջակցություն չցուցաբերել Ուկրաինայի դեմ պատերազմում։
«Մեծ յոթնյակի» երկրների կազմակերպությունը, որը ներկայումս ռոտացիոն կարգով ղեկավարում է Գերմանիան, Ուկրաինային հետագա օգնություն է խոստացել։
«Մենք վճռական ենք աջակցել ուկրաինացի կանանց և ուկրաինացի տղամարդկանց ռուսական ագրեսիային նրանց հերոսական դիմադրության մեջ, որն անօրինական է և չի կարող արդարացվել»,- ասվում է G7-ի ղեկավարների հայտարարության մեջ:
«Մեծ յոթնյակի» երկրները վստահեցրել են, որ Ռուսաստանի դեմ իրենց կողմից սահմանված պատժամիջոցները կիրականացվեն, իսկ անհրաժեշտության դեպքում՝ կընդլայնվեն։ Միաժամանակ, G7-ի ղեկավարներն ընդգծել են, որ բոլոր այն միջոցները, որոնք ձեռնարկում են, ուղղված չեն Ռուսաստանի բնակչության դեմ։
G7-ի ղեկավարները խստորեն քննադատել են նաև Ռուսաստանի հարձակումները Չեռնոբիլի ատոմակայանի վրա:
«Ռուսական հարձակումը վտանգի տակ է դրել ուկրաինական միջուկային օբյեկտների անվտանգությունը: Ռուսաստանի ռազմական գործողությունները բնակչությանը և շրջակա միջավայրը բացառիկ մեծ վտանգի տակ են դնում՝ հնարավոր աղետալի հետևանքներով»,- ընդգծել են նրանք:
«Մեծ յոթնյակի» երկրները նաև խոստացել են նվազեցնել կախվածությունը ռուսական էներգետիկ ռեսուրսներից։
Տաթև Ֆռանգյան
