Քաղաքականություն
24.03.2022 | 12:12Արցախի հարցով բանակցային գործընթացնում ՀՀ կարմիր գծերը չեն փոխվել 2018 թվականից հետո։ Այս մասին Աժ ճեպազրույցների ժամանակ ասաց «Քաղաքացիական պայմանագիր» խմբակցության պատգամավոր Արման Եղոյանը։
«Դուք ասում եք՝ որոնք են այս իշխանության կարմիր գծերը, ինձ կհիշեցնեք, թե ի՞նչ կարմիր գծեր ենք մենք ժառանգել։ Եվ դուք երբևէ իմացել եք՝ այդ կարմիր գծերը փաստաթղթվորված որտեղ են եղել։ Ես կարող եմ հավատացնել, որ Հայաստանի Հանրապետության կարմիր գծերը Արցախի կարգավորման հարցով չեն փոխվել 2018 թվականից հետո»,- նշեց Եղոյանը՝ անդրադառնալով հարցին, թե որոնք են այն կարմիր գծերը, որոնք գործող իշխանությունը չի հատի ադրբեջանցիների, թուրքերի հետ բանակցություններում, և ինչու հստակ չի ձևակերպվում, որ Արցախը որևէ կարգավիճակով չի կարող լինել Ադրբեջանի կազմում:
Եղոյանը հորդորեց չաղավաղել խոսքերը և սխալ մեջբերումներ չանել. «Վարչապետը ոչ թե զրոյական, այլ սեփական կետի մասին է խոսել»,- ասաց Եղոյանը՝ անդրադառնալով բանակցային գործընթացի վերաբերյալ լրագրողի դիտարկմանը:
«Քաղաքացիական պայմանագիր» խմբակցության պատգամավոր Վլադիմիր Վարդանյանը հավելեց. «Հստակ մի բան պետք է հիշենք՝ ինչ է տեղի ունեցել։ Ադրբեջանը Թուրքիայի աջակցությամբ ագրեսիվ պատերազմ նախաձեռնելով, հասել է «հաջողությունների»։ Էթնիկ զտման քաղաքականության տարբեր դրսևորումների հետ ենք բախվում այսօր։ Եվ ներքին կոնսոլիդացիայի փոխարեն մենք տեսնում ենք հինգերորդ շարասյանը բնորոշ գործունեությունը, որի նպատակը հետևյալն է՝ ամեն գնով թուլացնել Հայաստանում պետականությունը, ամեն գնով հասնել իշխանության։ Եթե նույնիսկ այդ իշխանության հասնելու գինը պետականության կորուստն է»։
Մանրամասները՝ տեսանյութում:
