Քաղաքականություն
22.03.2022 | 20:30Սուրեն Պապիկյանի ղեկավարած Պաշտպանության նախարարությունն ու վերջերս Մարդու իրավունքերի պաշտպանի պաշտոնում ընտրված Քրիստիննե Գրիգորյանը միմյանց հակասող տեղեկություններ են հայտնում Սյունիքի մարզի Ներքին Հանդ համայնքի ուղղությամբ ադրբեջանական զինուժի առաջխաղացման վերաբերյալ:
ՄԻՊ-ը հաստատում է համայնքի վարչական ղեկավար Խաչիկ Բաղդասարյանի՝ նախորդ շաբաթ հայտնած տեղեկությունը, որ ադրբեջանցի զինվորականները տեղակայվել են Ներքին Հանդի հարակից տարածքում: ՄԻՊ-ի գրասենյակը երեկ տարածած հաղորդագրությամբ մասնավորեցրել էր տարածքները, որոնք հայտնվել են թշնամու նշանառության տակ:
«Ներքին Հանդի գերեզմանատան, Հայրենական պատերազմի զոհերի հիշատակին նվիրված հուշակոթողի և Շինատեղ կոչվող գյուղատեղիի հարակից բլրի վրա 2022-ի մարտի սկզբին ադրբեջանական զինված ուժերի տեղակայումը, այդ թվում՝ մի քանի վրանների տեղադրումը և իրենց դիրքերից թիկունք կառուցվող նոր ճանապարհները, նոր են»,- ասվում է ՄԻՊ հաղորդագրությունում։
Ըստ ՄԻՊ-ի՝ բնակիչները նախկինում նշված տարածքում չեն նկատել ադրբեջանական զինծառայողների կամ նրանց որևէ դիրք՝ նշելով, որ դեռ երկու ամիս առաջ այդ տեղանքից փայտ են հավաքել։
Մինչ ՄԻՊ գրասենյակն ահազանգում է թշնամական պետության զինուժի առաջխաղացման մասին, Պաշտպանության նախարարությունը հերքում է ադրբեջանական կողմի առաջխաղացման մասին տեղեկությունները, սակայն ոչ ամբողջությամբ։ Գերատեսչության տարածած տեսանյութից պարզ է դառնում, որ ՊՆ-ն, ըստ էությա,ն ընդունում է տարածքի՝ Ադրբեջանի վերահսկողության տակ անցնելը, բայց ոչ թե այս տարվա մարտից, այլ նախորդ տարվա գարնանից:
«Նախորդ տարի փորվել են խրամատներ, որոնք պատճաշ կահավորման բացակայության պատճառով ձմեռային պայմաններում պիտանի չեն եղել, նրանք հեռացել են և վերադարձել այս գարնանը»,- նշում են ՊՆ-ից։
Սյունիքից ընտրված «Հայաստան» դաշինքի պատգամավոր Աննա Գրիգորյանը նշում է՝ ստացվում է, որ տարածքը, այնուհանդերձ, անցել է Ադրբեջանին, միայն թե ՊՆ-ում այդ մասին տեղեկացել են նախորդ տարի, բայց հանրությանը հայտնի է դարձել այս գարնանը:
Ի դեպ, չի բացառվում, որ ՊՆ-ի երեկ տարածած պարզաբանման ենթատեքստում այն է, որ թշնամու կողմից առաջխաղացումը եղել է այն ժամանակ, երբ Զինված ուժերի Գլխավոր շտաբը ղեկավարում էր Փաշինյանի հրաժարականը պահանջող Օնիկ Գասպարյանը: Նա, հիշեցնենք, Գլխավոր շտաբը ղեկավարեց մինչև անցյալ տարվա մարտի առաջին տասնօրյակը:
Ինչևէ, պաշտպանական գերատեսչության կողմից խուճապի չմատնվելու հորդորներին զուգահեռ՝ ՄԻՊ-ն ահազանգում է, որ ադրբեջանական զինված ուժերի կողմից նոր դիրքավորման արդյունքում ուղիղ նշանառության ու դիտարկման տակ է հայտնվել նաև գյուղի արոտավայրերի մեծ մասը՝ մոտ 50 հա, ինչպես նաև մի քանի գյուղացիների վարելահողերն ու այգիները: ՄԻՊ-ը շեշտում է՝ անասնապահությամբ ու գյուղատնտեսությամբ զբաղվող բնակիչների համար այս իրավիճակը լրջագույն դժվարություններ է ստեղծել իրենց ապրուստը հոգալու առումով։ ՊՆ-ն հակառակն է պնդում՝ հիմնավորելով, որ ադրբեջանցիները չեն կարող դիտարկել Ներքին Հանդը, քանի որ նրանց դիրքերը 2 կիլոմետր հեռու են, բացի այդ՝ գյուղի և նրանց միջև մի քանի բարձունք կա։
Իրականում ի՞նչ է կատարվում Ներքին Հանդում. Սյունիքից ընտրված ՔՊ-ական պատգամավոր Նարեկ Ղահրամանյանն առաջարկում է պաշտոնական լրահոսին հետևել, միայն թե իշխանական պատգամավորը չի նշում, թե քաղաքացին ինչ անի, երբ պաշտոնական լրահոսում միմյանց հակասող տեղեկություններ են հայտնվում:
Սյունիքից ընտրված իշխանական պատգամավորներն այսօր ամեն կերպ խուսափեցին պատասխանել լրագրողների՝ Ներքին Հանդին առնչվող հարցերին: Իսկ ահա Պաշտպանության և անվտանգության հարցերի խորհրդարանական հանձնաժողովի անդամ, իշխանական պատգամավոր Գագիկ Մելքոնյանը հաստատում է ՄԻՊ-ի տեղեկությունները, որ այս առաջխաղացմամբ վտանգվում է գյուղացիների կյանքը:
Պաշտպանության նախարարության պարզաբանման մեջ հատուկ ուշադրություն է գրավում նաև այն միտքը, որ թշնամին ցրտի պատճառով լքել է չկահավորված դիրքերը: Այստեղ հարց է առաջանում, թե ինչո՞ւ հայկական կողմը չի փորձել ապամոնտաժել կամ հետ վերադարձրել թշնամու լքած դիրքերը:
Իշխող խմբակցությունը չի բացառում, որ նման միջադեպեր հայ-ադրբեջանական սահմանին՝ Տավուշից մինչև Սյունիք՝ կարող են գրանցվել: Գագիկ Մելքոնյանը նշում է՝ ամեն վայրկյան թշնամին կարող է առաջ գալ, քանի դեռ սահմանների դեմարկացիայի ու դելիմիտացիայի գործընթաց տեղի չի ունեցել:
Մանրամասները՝ տեսանյութում։
Նարեկ Կիրակոսյան
