Ինձ մի սովորեցրեք նիստ վարել. վիճաբանություն՝ Հակոբ Արշակյանի և «Հայաստան» խմբակցության անդամների միջև․ ՏԵՍԱՆՅՈՒԹ

«Երիտթուրքերի հետ կոալիցիա կազմած ուժը եկել այստեղ Ցեղասպանության մասին է խոսում: Երիտթուրքերից մինչև «Բայրաքթարի» ամբասադոր. սա ձեր քաղաքական հետագիծն է, և դա դաջված է մնալու ձեզ վրա»,- Ազգային ժողովում ՀՀ տարածքային ամբողջականությունը կասկածի տակ դնելը քրեորեն հետապնդելի արարք սահմանելու մասին նախագծի քննարկման ժամանակ «Քաղաքացիական պայմանագիր» խմբակցության պատգամավոր Վահագն Ալեքսանյանն այսպես ավարտեց իր ելույթը, որից հետո ծափահարություններ հնչեցին:

Նիստը վարող ԱԺ փոխնախագահ Հակոբ Արշակյանն ասաց. «Կարծում եմ՝ արժե ծափահարել այս ելույթի համար: Իրականությունից զատ, այլ բան չի ասում այս մարդը»:

Տեղից «Հայաստան» խմբակցության քարտուղար Արծվիկ Մինասյանը հարց ուղղեց նիստը վարողին. «Դուք որևէ վիրավորանք չնկատեցի՞ք այս ելույթում»:

Ի պատասխան՝ Հակոբ Արշակյանը նշեց. «Վահագն Ալեքսանյանն ընդամենը նշեց, որ քարոզչական տեսահոլովակի մեջ կան «Բայրաքթարից» հայ զինվորներին խոցող կադրեր: Եթե որևէ մեկը սա վիրավորական է համարում, ապա չզետեղիք այդ կադրերը ձեր քարոզչական նյութերի մեջ:

Հարգելի՛ գործընկերներ, խնդրում եմ՝ հարգենք միմյանց: Եթե ինչ-որ բանից վիրավորվել եք, փաստն է արձանագրել, գնացեք հարցրեք՝ որտեղ է տեսել այդ փաստը, եթե վիրավորական է, ջնջեք: Իսկ այն, որ ասում եք՝ սուտ է, այ դա կարող է վիրավորանք լինել, եթե չկարողանաք հիմնավորել:

Խնդրում եմ՝ կոռեկտության սահմանները պահպանել, ինձ չսովորեցնել նիստ վարել: Ես նիստը վարում եմ, ինչպես կանոնակարգ օրենքով նախատեսված է»:

Մանրամասները՝ տեսանյութում: