28.03.2026 | 23:47
ՔՊ քվեարկություն․ առաջատար 10-յակը և ամենաքիչ ձայներ հավաքած թեկնածուն
ԱՄՆ-ն Ուկրաինա կուղարկի գաղտնի ձեռք բերված խորհրդային արտադրության ՀՕՊ միջոցները․ The Wall Street Journal
Քաղաքականություն
22.03.2022 | 13:42
ԱՄՆ-ն Ուկրաինային կուղարկի խորհրդային արտադրության հակաօդային պաշտպանության միջոցները, որոնք Վաշինգտոնը ձեռք է բերել տասնամյակներ առաջ՝ գաղտնի ծրագրի շրջանակում։ Այս մասին հայտնում է The Wall Street Journal-ը։
Նշվում է, որ համակարգերը ներառում են SA-8 փոքր հեռահարության «ցամաք-օդ» հրթիռները, որոնք ԱՄՆ-ը ձեռք է բերել՝ ռուսական ռազմական տեխնոլոգիաների ուսումնասիրության և ամերիկյան զորքերի պատրաստման համար։
ԱՄՆ պաշտոնյաները լրատվամիջոցին ասել են, որ զենքերն օգտակար են ուկրաինական ուժերի համար, քանի նրանք արդեն գիտեն՝ ինչպես օգտագործել խորհրդային համակարգերը։
Ե՛վ Ազգային անվտանգության խորհուրդը, և՛ Պենտագոնը հրաժարվել են մեկնաբանել, թե կոնկրետ ինչ զենք է ԱՄՆ-ն ուղարկել Ուկրաինային։
«Նրանք կռվում են իրենց երկրի համար, և Պենտագոնը չի պատրաստվում մանրամասն հանրայնացնել այն գործիքները, որով նրանք անում են դա»,- ասել է Պենտագոնի խոսնակ Ջոն Քիրբին։
ԱՄՆ-ն ունի փոքրաթիվ խորհրդային հակահրթիռային պաշտպանության համակարգեր, որոնք ձեռք է բերել վերջին 30 տարիներին՝ 100 միլիոն դոլար արժողությամբ գաղտնի նախագծի շրջանակում, որի մասին առաջին անգամ հայտնի դարձավ 1994 թվականին։
ԱՄՆ-ի ստացած զենքերի թվում է SA-8-ը, որը հեշտությամբ կարելի է տեղափոխել ցամաքային ուժերով և օդանավերից և ուղղաթիռներից ծածկույթ ապահովել: ԱՄՆ-ի պահեստում կա նաև C-300 հեռահար հակաօդային պաշտպանության համակարգը: Այն կոչված է պաշտպանելու ավելի մեծ տարածքներ և արդեն ու շահագործվում է ուկրաինացիների կողմից: Ըստ պարբերականի աղբյուրի՝ այդ զենքը չի ուղարկվի Ուկրաինա։
Հիշեցնենք՝ ԱՄՆ նախագահ Ջո Բայդենն այս շաբաթ մեկնելու է Բրյուսել՝ մասնակցելու ՆԱՏՕ-ի գագաթնաժողովին, որի շրջանակում քննարկելու է Ուկրաինային օգնելու ուղիները։
«Մենք շարունակում ենք աշխատել մեր դաշնակիցների և առանցքային գործընկերների հետ՝ նոր օգնություն հասցնելու համար, այդ թվում՝ խորհրդային կամ ռուսական արտադրության հակաօդային համակարգերի և դրանք օգտագործելու համար անհրաժեշտ զինամթերքի տեսքով»,- ասել է ամերիկացի պաշտոնյան։
Էմմա Չոբանյան
