Առաջարկվում է խոշտանգումների դեպքերն ու ընտրական մի շարք հանցագործություններ այլևս ԱԱԾ-ում չքննել, այլ ՔԿ-ում՝ բացառությամբ որոշ դեպքերի

Այսօր՝ մարտի 15-ին, ԱԺ պետական-իրավական հարցերի մշտական հանձնաժողովի նիստում առաջին ընթերցմամբ քննարկվեց Կառավարության հեղինակած «ՀՀ քրեական դատավարության օրենսգրքում փոփոխություններ և լրացում կատարելու մասին» և «ՀՀ քրեական դատավարության օրենսգրքում փոփոխություն կատարելու մասին» օրենքների նախագծերի փաթեթը:

Արդարադատության նախարարի տեղակալ Արփինե Սարգսյանն ասաց, որ նախագծերի փաթեթով առաջարկվում է կատարել երեք հիմնական փոփոխություն, որի արդյունքում կապահովվի խոշտանգումների և ընտրական հանցագործությունների դեպքերով քրեական գործերի քննության իրականացումը պետական մարմինների ենթակայության տեսանկյունից անկախ մարմնի կողմից:
Փոխնախարարի տեղեկացմամբ՝ գործող Քրեական դատավարության օրենսգրքով խոշտանգման հանցակազմով գործերը քննվում են ԱԱԾ քննչական դեպարտամենտում, ինչը, սակայն, հակասում է միջազգային մի շարք ստանդարտների, որոնցում նշված է, որ նմանատիպ հանցագործությունների քննման համար պետք է ընտրվի այնպիսի քննչական մարմին, որը թե ինստիցիոնալ, թե գործառութային տեսանկյունից անկախության ավելի բարձր երաշխիքներ ունի:

Նկատի ունենալով վերոնշյալ հանգամանքները՝ ԱԱԾ-ն չի կարող քննել նմանատիպ գործերը: Ուստի, առաջարկվում է այդպիսի քննչական մարմին դիտարկել Քննչական կոմիտեն: Իսկ Քննչական կոմիտեի քննիչների կողմից կատարված խոշտանգման դեպքերի քննությունն առաջարկվում է տալ Ազգային անվտանգության ծառայության քննչական դեպարտամենտին:

Հաջորդ փոփոխությամբ առաջարկվում է երեք ընտրական հանցագործություններով` 149-րդ, 150-րդ, 151/1-րդ հոդվածների քննությունը, որն այս պահին գտնվում է ԱԱԾ քննչական դեպարտամենտում, նույնպես վերապահել Քննչական կոմիտեին:

Նախարարի տեղակալի խոսքով՝ այս պահի դրությամբ բոլոր ընտրական հանցագործությունները, որոնք կոռուպցիոն տարրեր չունեն, քննում է հենց Քննչական կոմիտեն:

Քննարկման արդյունքում Պետաիրավական հարցերի մշտական հանձնաժողովն օրենքների նախագծերի փաթեթին դրական եզրակացություն տվեց։ Հաջորդիվ փաթեթը կքննարկվի ԱԺ լիագումար նիստերի ընթացքում։

Մերի Մարտիրոսյան