Որքա՞ն կտուգանվեք ռեստորանում ծխելու համար․ այսօրվանից ուժի մեջ է մտնում արգելքը․ ՏԵՍԱՆՅՈՒԹ

Այսօրվանից ուժի մեջ է մտնում ծխախոտային արտադրատեսակների, ծխախոտային արտադրատեսակների փոխարինիչների օգտագործման արգելքը հանրային սննդի բոլոր օբյեկտներում, այդ թվում՝ բացօթյա (ճաշարաններ, ռեստորաններ, սրճարաններ, բարեր, բուֆետներ և խոհարարական արտադրանքի պատրաստման և իրացման այլ օբյեկտներ):

Օրեր առաջ Առողջապահության նախարարությունը ևս մեկ լրացում էր առաջարկել օրենքում՝ հստակեցնելով ծխախոտային փոխարինիչների մեջ կիրառվող նյութի տեսակները։ Փոփոխությունն արտահերթ կարգով խորհրդարան էր բերել փոխնախարար Լենա Նանուշյանը։ «Մեկ բառ է, որը ավելանում է ծխախոտային արտադրատեսակների սահմանման մեջ՝ «լուծույթ» բառից հետո լրացնում ենք «նյութ» բառը։ Ընդամենը այս մեկ բառով փորձում ենք լուծել այն ծխախոտային արտադրատեսակներին վերաբերող բացը, որոնք էլեկտրոնային են, սակայն աշխատում են ոչ թե լուծույթի, այլ պինդ նյութի միջոցով, որը պարունակում է նիկոտին», – նշել էր Նանուշյանը:

Պաշտոնական տվյալներով՝ Հայաստանում 18-ից 69 տարեկանների ավելի քան 28 տոկոսը օգտագործում է ծխախոտի որևէ տեսակ: Ըստ առողջապահության նախարարության՝ ուժի մեջ մտնող արգելքն ուղղված է հանրային առողջության բարելավմանը։

Այն խախտելն առաջացնում է տուգանքի նշանակում.

• պաշտոնատար անձի նկատմամբ՝ 150 000 – 200 000 ՀՀ դրամ,
• ֆիզիկական անձի նկատմամբ՝ 50 000 ՀՀ դրամ:

Դրույթի վերահսկողությունն իրականացվում է ՀՀ Ոստիկանության կողմից:

Մանրամասները՝ տեսանյութում։