«Ատելությունը չկանխվեց Ղարաբաղում․ Ուկրաինայի դեպքերը նույն տրամաբանական շղթայի շարունակությունն են»․ Դավիթ Ամիրյան․ ՏԵՍԱՆՅՈՒԹ

Շատ է բարձրաձայնվել այն մասին, որ հայատյացությունը միայն Հայաստանում կամ Արցախում չի դրսևորվում, որ այն դուրս է գալիս հայկական պետությունների սահմաններից, և դա պետք է կանխել։ Այսօր «Հայատյացությունն Ադրբեջանում և էթնիկ զտումների վտանգ Արցախում» թեմայով քննարկման ժամանակ այս մասին ընդգծեց «Բաց հասարակության հիմնադրամներ-Հայաստանի» ծրագրերի գծով փոխտնօրեն Դավիթ Ամիրյանը:

Նրա գնահատմամբ՝ առաջադեմ մարդկության և միջազգային հանրության, կազմակերպությունների կողմից նկատելի չէ բավարար գնահատում և աջակցություն այն արժեքներին, որոնք հայերն ու Հայաստանն են որդեգրել՝ ապրելու համար, և սա մտածելու ու վերաիմաստավորելու տեղիք է տալիս:

«Մենք այսօր տեսնում ենք, թե քանակով մի քանի տասնյակ անգամ ավելի մեծ ժողովուրդների մեջ ինչ է տեղի ունենում: Ուկրաինացիներն ու ռուսներն ի՞նչ հարաբերություններ ունեն այսօր․ սա ատելության մի տրամաբանական շղթայի շարունակությունն է, և եթե դա չի կանխվել մի փոքրիկ տարածքում կամ տարածքի նկատմամբ, ինչպիսին Արցախն է, այն այսօր արդեն դարձել է մի ամբողջ մայրցամաքի համար վտանգ, և Եվրոպան խոսում է այդ վտանգի մասին՝ իր տեսակետից ելնելով: Մենք նաև պիտի հասկանանք, որ մեկ օրում ստեղծված տրամադրությունն ու վտանգն ինչքան դժվար է հանել, նույնիսկ եթե խոսքը գնում է սերունդների մասին: Երբ տեղի ունեցավ Բուդապեշտի ողբերգական դեպքը (քնած ժամանակ հայ սպա Գուրգեն Մարգարյանի սպանությունը Ռամիլ Սաֆարովի կողմից), և դա ոնց ընդունվեց Ադրբեջանի կողմից, հետո շարունակվեց հարաբերություններն այդ երկրի ղեկավարի հետ՝ մնացած ամբողջ զարգացած աշխարհի կողմից, մենք շատ տրամաբանորեն կարող ենք դա համարել այն հիմքերից մեկը, ինչ այսօր տեղի է ունենում Ուկրաինայում»,- նշեց Ամիրյանը:

Մանրամասները՝ տեսանյութում: