18.12.2025 | 14:12
Կճոյանը կդառնա՞ կաթողիկոսական տեղապահ․ Փաշինյանի արձագանքը․ ՏԵՍԱՆՅՈՒԹ
Պատերազմով և արյան գնով աշխարհակարգ է փոխվում․ հզոր ուժերը բախվել են Ուկրաինայում․ Էմիլ Օրդուխանյան. ՏԵՍԱՆՅՈՒԹ
Քաղաքականություն
01.03.2022 | 20:32
Factor TV-ի հարցազրույցը քաղաքագետ Էմիլ Օրդուխանյանի հետ
-Պարո՛ն Օրդուխանյան, արդեն վեց օր շարունակվում է պատերազմը Ուկրաինայի դեմ։ ՌԴ պաշտպանության նախարար Սերգեյ Շոյգուն այսօր հայտարարել է, որ շարունակելու են հատուկ ռազմական գործողությունն Ուկրաինայում՝ մինչև իրենց նպատակներին հասնելը։ Իսկ այդ նպատակը, ըստ ՌԴ-ի, Արևմուտքի ռազմական սպառնալիքից պաշտպանելն է ՌԴ-ին։ Նշանակում է՝ ո՞ր պարագայում են կանգնելու ռուսները։
-Պատմական էքսկուրսով սկսենք․ եթե տարիներ առաջ ԽՍՀՄ-ի և Արևմուտքի մեջ էր մրցակցությունը, ապա հիմա արդեն շահերի բախում է ՌԴ-ի և Արևմուտքի միջև։ Աշխարհակարգի վերաձևակերպման պրոցես է։ Հիմա, իհարկե, պետք է հասկանալ՝ որն է այս ամենի նպատակը։ Նպատակն ազդեցության գոտիների վերաբաշխումն է և, ցավոք, աշխարհակարգի փոփոխությունը, որի վերաձևումը ենթադրում է պատերազմական գործողություններ, և դժվարությամբ, կյանքի ու արյան գնով է լինում այդ ամենը։ Հետևապես՝ սա աշխարհակարգի վերաձևակերպման մեջ պետք է դիտարկել։ Հիմա՝ ավելի մասնավոր․ մեծ տերությունների շահերը բախվել են, և ռազմական գործողություններն իրականանում են Ուկրաինայի տարածքում։
-ՌԴ-ի ժողովուրդը բարեկեցիկ չի ապրում։ Տնտեսության զարգացման իմաստով աշխարհի առաջատարներից չէ՝ տնտեսությունը հիմնված է բնական պաշարների, ոչ թե ինտելեկտի, առաջատար տեխնոլոգիաների վրա՝ ի տարբերություն ԱՄՆ-ի։ Եթե ատոմային զենքը չլինի, ինչո՞վ կարող է Պուտինն իր ծրագրերը սպասարկել։ Պետության դիմադրողականությունն ու բովանդակությունն այնպիսի՞ն է, որ փորձի դառնալ ուժային կենտրոններից մեկն աշխարհում։
-Նախ՝ միջուկային զենքը հեգեմոն չէ, չկա մի գերտերություն, որ տիրապետում է ողջ աշխարհում։ Միջուկային սպառնալիքը հավասարաչափ ոչնչացում է ենթադրում։ Սա է պատճառը, որ դա համարվում է զսպման զենք, ոչ թե հարձակողական, և այս պարագայում ես չեմ կարծում, որ բանը կհասնի միջուկային զենքի կիրառությանը։ Սա թե՛ անմիջական կոնֆլիկտի կողմերի, թե՛ ընդհանրապես չունեցողների համար շատ բացասական և ոչնչացնող հետևանքներով է հղի, և բոլորն են գիտակցում դա։ Ուղղակի՝ զինանոցում ունենալ այդ զինատեսակը որոշակի առավելության դիրք է տալիս նրանց նկատմամբ, որոնց զինանոցում չկա այդ զինատեսակը։ Սա շատ ավելի մարտավարական հնարք է, քան իրականանալու հավանականություն ունեցող սցենար։
Հարցազրույցն ամբողջությամբ՝ տեսանյութում։
Ռոբերտ Անանյան
