Համաշխարհային նոր պատերազմի շեմին․ ինչ հետևանքներ կունենա ՀՀ-ի ներքաշումը ռուս-ուկրաինական կոնֆլիկտում․ «Ուշադրության կենտրոնում»․ ՏԵՍԱՆՅՈՒԹ

Factor TV-ի «Ուշադրության կենտրոնում» հաղորդաշարի թեման Ուկրաինայի շուրջ ստեղված իրավիճակն է և դրա հնարավոր ազդեցությունը մեր տարածաշրջանի վրա։

«Գլոբաիզացիայի և տարածաշրջանային հետազոտությունների վերլուծական կենտրոնի» ղեկավար Ստեփան Գրիգորյանի խոսքով՝ Ուկրաինայում Հայաստանի նկատմամբ վերաբերմունքը վատ չէ՝ չնայած նրան, որ ինքը վերջերս՝ Կիևում եղած ժամանակ, սպասում էր, որ ավելի շատ քննադատություններ կհնչեին։

«Դաշտ կա աշխատելու»,- ասաց նա։  Գրիգորյանն, ամեն դեպքում, ունի մտավախություն, որ Հայաստանը կանգնելու է ընտրության առջև՝ աջակցի՞ Ռուսաստանի ագրեսիային, թե՞ չեզոքությունը շարունակի պահել։
«Ես չեմ զգում, որ մեր իշխանությունները «կարմիր գծերը» չեն հատի։ Հասկանում եմ, թե որքան դժվար է լինելու։ Հասկանում եմ, որ նրանց կարող են ստիպել, բայց պետք է ընդառաջ քայլեր անել, այսինքն՝ ոչ թե սպասել, որ իր «ռազբորկան» սկսվի ու քեզնից պահանջեն․․․ Ինչո՞ւ Ադրբեջանը գնաց Կիև։ Մեկ պատճառով․ եթե վաղը, մյուս օրը Ռուսաստանը նրանից ինչ-որ բան պահանջի, ինքն ասի՝ «ես իմ դիրքորոշումն արդեն ցույց եմ տվել»,- մատնանշեց նա։

Քաղաքական և տնտեսական ռազմավարական հետազոտությունների կենտրոնի ղեկավար Բենիամին Պողոոսյանն ուղղակի ռազմական ներգրավվածության հավանականությունը բացառեց, սակայն միևնույն ժամանակ նշեց, որ Հայաստանը Ուկրաինայի հետ հակամարտությունում Ռուսաստանին կարող է սատարել տարբեր միջազգային կառույցներում իր քվեարկություններով, ինչպես արել է տարիներ շարունակ։

«Այդ տենդենցը կշարունակվի։ Բայց այն, որ թեկուզ մեկ հայ զինվոր ուղղակի մեկնի Ուկրաինա, այնտեղ մասնակցի որևէ ռազմական գործողության՝ դա կլինի երկկողմ հայ-ռուսական ձևաչափով, ՀԱՊԿ-ի ձևաչափով՝ խաղաղապահ կամ օպերատիվ արձագանքման կոլեկտիվ ուժերի տեսքով, ես դրա հնարավորությունը գնահատում եմ գրեթե զրոյին մոտ»,- ասաց նա։
Ռազմաքաղաքական հարցերով փորձագետ Արեգ Քոչինյանը Ուկրաինայում լայնամասշտաբ պատերազմը շատ քիչ հավանական համարեց, բայց դրա լինելու պարագայում նա վստահ է, որ Ռուսաստանը ներգրավելու է Հայաստանին իր գործողություններում։

«Այստեղ հարցը այն է, որ այդ դեպքում Ռուսաստանը կդառնա վտարանդի պետություն աշխարհի համար։ Եվ իր պատկերացումն այն է, որ այդ ժամանակ իր ազդեցության տակ գտնվող երկրները նույնպես դառնան «վտարանդի պետություններ» աշխարհի համար։ Դրանով նա հավելյալ անգամ կկրկնապատկի իր ազդեցությունն այդ երկրներում։ Երբ նա կործանվում է, նա պետք է իր հետ մյուսներին քաշի»,- ասաց նա։

Մանրամասները՝ տեսանյութում։

Հռիփսիմե Հովհաննիսյան