Ռուսաստանը Կիևում հարվածել է կամրջին՝ Մերցի այցի օրը

Գերմանիայի դաշնային կանցլեր Ֆրիդրիխ Մերցի՝ Կիև կատարած այցի օրը ռուսական ուժերը հերթական հարվածն են հասցրել Դնեպր գետի վրայով անցնող կամրջին։

«Հյուսիսային կամրջի երթևեկելի հատվածին հարված է հասցվել։ Արտակարգ ծառայությունները շարժվում են դեպքի վայր»,- կիրակի՝ հոկտեմբերի 4-ին, Telegram-ում գրել է Ուկրաինայի մայրաքաղաքի քաղաքապետ Վիտալի Կլիչկոն։

Ռուսական ստորաբաժանումները հարվածել են նաև Դնեպր քաղաքի կենտրոնում գտնվող կապի ընկերության օբյեկտին։ Դնեպրոպետրովսկի մարզի ռազմական վարչության ղեկավար Ալեքսանդր Գանժան հայտնել է, որ հարվածի ենթարկված շենքի մոտ աշխատում են բոլոր արտակարգ ծառայությունները։ Նրա խոսքով՝ Դնեպրի կենտրոնում հրդեհ է բռնկվել, տուժածների մասին տեղեկությունները ճշտվում են։

Գանժայի տվյալներով՝ ռուսական ուժերը Դնեպրոպետրովսկի մարզը անօդաչու թռչող սարքերով ավելի քան 10 անգամ են հարձակման ենթարկել։ Հարվածների տակ են հայտնվել Նիկոպոլը և Նիկոպոլի շրջանը, որտեղ վնասվել է միկրոավտոբուս։ Հարձակման են ենթարկվել նաև Կրիվոյ Ռոգի և Պավլոգրադի շրջանները, վնասվել է ձեռնարկություն։

Նույն առավոտյան Ռուսաստանի զինված ուժերը հինգ կառավարվող ավիառումբ են նետել Սումիի մարզի ուղղությամբ, հայտնել են տեղի իշխանությունները։

«Եվս մեկ հարված բնակելի հատվածին։ Բազմահարկ շենքի հարևանությամբ հարված է եղել։ Առնվազն 5 մարդ տուժել է։ Նախնական տվյալներով՝ նրանցից երկուսը ծանր վիրավորումներ են ստացել»,- հայտնել է Սումիի մարզային ռազմական վարչության ղեկավար Օլեգ Գրիգորովը։

Նրա տվյալներով՝ Սումիում քաղաքացիական ենթակառուցվածքի օբյեկտներից մեկին ռուսական հարվածի հետևանքով հրդեհ է բռնկվել։

«Ծխի պատճառով քաղաքի բնակիչներին խորհուրդ է տրվում փակել պատուհանները և հնարավորության դեպքում քիչ ժամանակ անցկացնել դրսում։ Դեպքի վայրում աշխատում են համապատասխան ծառայությունները»,- գրել է մարզային ռազմական վարչության ղեկավարը։