Քաղաքականություն
25.12.2021 | 17:22«Երբ ասում են, որ Երևանի քաղաքապետի պաշտոնը քաղաքական պաշտոն է, դա ինձ զարմացնում է: Քաղաքապետը հասարակական պաշտոն է, պետք է ծառայի հասարակությանը, ոչ թե սպասարկի որևէ քաղաքական ուժի: Հայկ Մարությանին հեռացնելը Փաշինյանի մեսիջն էր` ուղղված ՔՊ-ականներին, որ եթե ես մատաղ եմ անում հեղափոխության գլխավոր դերակատարներից և իմիջմեյքերներից մեկին, պատկերացրեք` ձե´զ հետ ինչ կարող է պատահել»,- Factor TV-ի հետ զրույցում նման տեսակետ է հայտնում կոմպոզիտոր, երգիչ Վահան Արծրունին` անդրադառնալով Երևանի արդեն նախկին քաղաքապետ Հայկ Մարությանին պաշտոնանկ անելու գործընթացին:
Նա խոսում է նաև ԱԺ նախագահ Ալեն Սիմոնյանի ծաղրական արձագանքից` Հայկ Մարությանի աղմկահարույց հայտարարությունների հետ կապված (օրինակ` Հայկ Մարությանն ասել էր, որ հեղափոխականները պետք է բարելավեին հանրության կյանքը, սակայն եկան և բարելավեցին իրենց կյանքը):
«Ալեն Սիմոնյանի արձագանքը բնական էր, այլ ձևաչափով արձագանքն ինձ կզարմացներ: Այն, ինչ այսօր կատարվում է ԱԺ-ում, Երևանի ավագանիում, նախարարություններում, օրինաչափ է. չկա աշխատանք, արդյունք, բովանդակություն, փոխարենը կա դիլետանտիզմ և տգիտություն»,- ասում է Վահան Արծրունին:
Կոմպոզիտորը անդրադառնում է նաև արտաքին քաղաքական թեմաների, մասնավորապես` հայ-թուրքական հարաբերությունների հնարավոր կարգավորմանը.
«Իհարկե, հնարավոր համարում եմ հայ-թուրքական հարաբերությունների կարգավորումը, բայց ի՞նչ կարգավիճակով: Եթե Հայաստանը Ռուսաստանի «սատելիտ երկիրն է», խոսել հայ-թուրքական համազոր հարաբերություններից` անհնար է: Առհասարակ, այդ կարգավիճակով որևէ պետության հետ հնարավոր չէ համազոր հարաբերվել:Մենք ինքներս պետք է փաստենք մեր սուվերենությունը, որպեսզի ճիշտ հարաբերվենք աշխարհի հետ»:
Մանրամասները` տեսանյութում:
Աննա Բաբաջանյան
