18.12.2025 | 18:56
Միրզոյանը Շեկերինսկայի հետ քննարկել է ՀՀ–ՆԱՏՕ համագործակցության խորացումն ու նոր գործընկերային օրակարգը
Միխեիլ Սաակաշվիլին հերթական դատավարությանը չի մասնակցի առողջական պատճառներով
Քաղաքականություն
22.12.2021 | 13:21
Վրաստանի նախկին նախագահ Միխեիլ Սաակաշվիլին առողջական պատճառներով չի կարողանա մասնակցել չորեքշաբթի կայանալիք պետական սահմանի ապօրինի հատման գործով դատական նիստին։ Այս մասին ՏԱՍՍ-ին հայտնել է Վրաստանի նախկին առաջնորդի փաստաբան Դմիտրի Սաձաղլիշվիլին։
«Որքանով ես գիտեմ՝ ուղեկցող պահակախումբը նրան հիվանդանոցից չի տեղափոխել, նա ներկա չի լինի այսօրվա դատավարությանը, պատճառը նրա առողջական վիճակն է»,- ասել է Սաձաղլիշվիլին։
Սաակաշվիլիին հոկտեմբերի 20-ին մեղադրանք է առաջադրվել սահմանը ապօրինի հատելու համար։ Ըստ մեղադրող կողմի՝ Վրաստանի նախկին ղեկավարը սեպտեմբերի 28-ին գաղտնի երկիր է ժամանել Ուկրաինայից կաթնամթերքով բեռնված բեռնատարով։ Բացի Սաակաշվիլիից՝ այս գործում ներգրավված է ևս չորս մարդ, որոնք, ըստ Գլխավոր դատախազության, օգնել են նրան տեղաշարժվել երկրով մեկ՝ մինչև հոկտեմբերի 1-ին Թբիլիսիում ձերբակալվելը։ Այս գործով Սաակաշվիլիին սպառնում է մինչև հինգ տարվա ազատազրկում։
Հիշեցնենք՝ Սաակաշվիլին Վրաստանը լքել էր 2013 թվականին, որից հետո երկրում նրա դեմ չորս քրեական գործ է հարուցվել, որոնցից երկուսով քաղաքական գործիչը հեռակա դատապարտվել է երեք և վեց տարվա ազատազրկման։ Եվս երկու գործով՝ 2007 թվականի նոյեմբերի 7-ի ընդդիմության ցույցի բռնի ցրելու և վրացական «Իմեդի» հեռուստաընկերության գրասենյակը ջարդուփշուր անելու և մոտ 9 միլիոն լարիի (ավելի քան 2,9 միլիոն դոլար) պետական միջոցների յուրացման գործերով դատավարությունը շարունակվում է։
Տաթև Ֆռանգյան
