14.09.2026 | 10:46
Օմանը հետաձգել է Հորմուզի նեղուցի շուրջ Իրանի և տարածաշրջանի երկրների հետ բանակցությունները
Թուրքիայի խորհրդարանում կին պատգամավորների միջև ծեծկռտուք է տեղի ունեցել․ ԼՈՒՍԱՆԿԱՐՆԵՐ
Քաղաքականություն
17.12.2021 | 15:15
Թուրքիայի խորհրդարանում դարձյալ ծեծկռտուք է տեղի ունեցել, այս անգամ՝ կին պատգամավորների միջև։ Թուրքական լրատվամիջոցների հաղորդմամբ՝ բյուջեի քննարկումների ժամանակ ելույթ է ունեցել իշխող «Արդարություն և զարգացում» կուսակցության Տրապիզոնի պատգամավոր Բահար Այվազօղլուն՝ իր խոսքում թիրախավորելով գլխավոր ընդդիմադիր Ժողովրդահանրապետական կուսակցության (CHP) ղեկավար Քեմալ Քըլըչդարօղլուին և կուսակցության պատգամավորներին։
Այվազօղլուի խոսքերից հետո CHP-ի խմբակցության փոխնախագահ Օզգյուր Օզելը դահլիճում գտնվող կուսակցության բոլոր պատգամավորների համար 2-ական րոպե խոսք է պահանջել։
Մեջլիսի փոխնախագահ Հայդար Աքարը դրական է արձագանքել պահանջին, որից հետո լարվածություն է առաջացել իշխող և ընդդիմադիր խմբակցություններից կին պատգամավորների միջև։ Պատգամավոր Այվազօղլուն և Իզմիրից պատգամավոր Ջեյդա Բոլունմեզ Չանքըրը վիճել են ընդդիմադիր կուսակցության պատգամավորներ Բուրջու Քյոքսալի և Գյուլիզար Բիչեր Քարաջայի հետ։ Նրանց միջև ծեծկռտուք է տեղի ունեցել, որին միջամտել են տղամարդ պատգավորներն՝ փորձելով բաժանել նրանց։
Հավելենք, որ օրերս էլ ծեծկռտուք էր տեղի ունեցել իշխող ու ընդդիմադիր կուսակցությունների տղամարդ պատգամավորների միջև, որը հրահրել էր ներքին գործերի նախարար Սուլեյման Սոյլուն։
Էմմա Չոբանյան
