Քաղաքականություն
15.12.2021 | 19:40
ԱՄՆ Կոլումբիայի շրջանային դատարանը մերժել է երկրի նախկին նախագահ Դոնալդ Թրամփի հայցը՝ Կոնգրեսի Ներկայացուցիչների պալատի Միջոցների և մեթոդների հարցերով հանձնաժողովին իր հարկային տեղեկատվությանը հասանելիություն չտրամադրելու վերաբերյալ: Որոշումը դատարանը հրապարակել է դեկտեմբերի 14-ին, գրում է DW-ի ռուսական ծառայությունը։
Բանաձևում նշվում է, որ կոնգրեսականների օրենսդրական շահը գերազանցում է «նույնիսկ հատուկ հարգանքը նախկին նախագահների նկատմամբ»։ Դատարանը հիմնվել է մի շարք նախադեպերի վրա, որոնք խոսում են ԱՄՆ Կոնգրեսի պահանջները բավարարելու օգտին։ Երկրի նախկին ղեկավարի փաստաբանները 14 օր ունեն՝ որոշումը բողոքարկելու համար։
Դոնալդ Թրամփը Միացյալ Նահանգների առաջին նախագահն է, որը հրաժարվել է հարկային տվյալների հրապարակումից։ Ներկայացուցիչների պալատի հանձնաժողովը բողոքարկել է այս գործողությունները դեռ 2019 թվականին։
2020-ին The New York Times-ը գրել էր, որ Թրամփը տասը տարի շարունակ եկամտահարկ չի վճարել՝ օգտագործելով 1980-90-ականներին կրած վնասները փոխհատուցումը։
Թրամփը պարտվել է կոնգրեսականներից տեղեկությունները թաքցնելու վերաբերյալ արդեն երկրորդ դատավարությունը։ Նոյեմբերի 10-ին դատարանը մերժել է նրա հայցը Սպիտակ տան արխիվների բացահայտման դեմ՝ Կոնգրեսի Ներկայացուցիչների պալատի հատուկ հանձնաժողովի հետաքննության շրջանակում հունվարի 6-ին Կապիտոլիումի գրոհի վերաբերյալ:
Տաթև Ֆռանգյան
