19.12.2025 | 10:36
Արտարժույթների փոխարժեքները՝ դեկտեմբերի 19-ի դրությամբ
Վլադիմիր Պուտինն ու Սի Ցզինպինը առցանց բանակցություններ են անցկացրել
Քաղաքականություն
15.12.2021 | 15:51
ՌԴ նախագահ Վլադիմիր Պուտինը և Չինաստանի ղեկավար Սի Ցզինպինը տեսակապով բանակցություններ են անցկացրել, գրում է ՌԻԱ Նովոստին։
Նշվում է, որ զրույցը տևել է մեկուկես ժամ։ Բանակցությունների բաց հատվածում երկու երկրների ղեկավարները քննարկել են երկու երկրների երկխոսությունն ու անդրադարձել միջազգային օրակարգի հարցերի։
«Ուրախ եմ Ձեզ հետ ուղիղ կապի հնարավորության համար։ Մեր հարաբերությունները համարում եմ 21-րդ դարում միջպետական հարաբերությունների իսկական օրինակ»,- ասել է Պուտինը հանդիպման սկզբում։
Չինաստանի ղեկավարն իր հերթին շնորհակալություն է հայտնել Ռուսաստանի նախագահին՝ Մոսկվայի և Պեկինի միջև սեպ խրելու փորձերին դիմակայելու համար, ինչպես նաև նշել համատեղ նախագծերի ու առևտրաշրջանառության աճի մասին։
«Այս տարվա հունվար-նոյեմբերին առևտրաշրջանառությունն ավելացել է 31 տոկոսով՝ հասնելով 123 մլրդ դոլարի։ Արդեն 2019 թվականի ռեկորդային ցուցանիշները գերազանցվել են։ Մոտ ապագայում, ինչպես և պայմանավորվել ենք, կհաղթահարենք 200 մլրդ դոլարի շեմը»,- ասել է Պուտինը։
Բացի այդ, նա Չինաստանն անվանել է ռուսական պատվաստանյութերի արտադրության միջազգային կենտրոն․ չինական վեց արտադրողների հետ կնքվել են ավելի քան 150 միլիոն դեղաչափ պատվաստանյութի արտադրության պայմանագրեր։
Կողմերը նաև փետրվարին անձնական հանդիպման և Պեկինում ձմեռային օլիմպիական խաղերի բացման արարողությանը համատեղ մասնակցության հույս են հայտնել։
Բացման ելույթներից հետո բանակցությունները շարունակվել են փակ ռեժիմով։
Նշենք, որ երկու երկրների ղեկավարների նախորդ՝ հունիսի 28-ի գագաթնաժողովը կրկին առցանց էր անցկացվել։
Էմմա Չոբանյան
