11.10.2026 | 20:00
15 հազար մարդ Հայաստան է գալիս․ ի՞նչ է սպասվում COP17-ում․ բնությունը մարդուց պաշտպանելու ՇԵՐՏԵՐԸ
Սեյրան Օհանյանը հրավիրվել է Դատախազություն՝ ապօրինի ծագում ունեցող գույքի բռնագանձման գործընթացի շրջանակներում
Հասարակություն
15.12.2021 | 14:54
Ապօրինի ծագում ունեցող գույքի բռնագանձման գործընթացի շրջանակում Գլխավոր դատախազություն է հրավիրվել պաշտպանության նախկին նախարար, ԱԺ «Հայաստան» խմբակցության պատգամավոր Սեյրան Օհանյանը։ Այս մասին Factor.am-ի հետ զրույցում տեղեկացրեց Արթուր Դավթյանի խորհրդական Գոռ Աբրահամյանը։
«Սեյրան Օհանյանը Դատախազության կողմից հրավիրվել է, ինքն էլ եկել է՝ իր իրավունքից է օգտվել ուսումնասիրության նյութերին ծանոթանալու համար՝ դրա վերաբերյալ դիրքորոշում հայտնելու նպատակով: Այս պահին գործընթացը շարունակվում է»,- հավելեց Աբրահամյանը։
Նշենք, որ Սեյրան Օհանյանի, նրա կնոջ՝ Ռուզաննա Խաչատրյանի և նրանց հետ փոխկապակցված մի քանի անձանց գույքի վրա կալանք է դրվել։ Օրեր առաջ, անդրադառնալով այս հարցին, Օհանյանը հայտարարեց, որ տեղյակ չէ, թե իր գույքերից որոնք են համարվել ապօրինի և կալանքի տակ առնվել։
«Այն, ինչ ես կամ իմ ընտանիքը հայտարարագրել է, դրանք էլ ունենք և այդ գույքին տիրապետում ենք։ Ինձ առաջադրվող մեղադրանքն ապօրինի է և չեմ ընդունում այն»,- նշեց Օհանյանը։
Հիշեցնենք, որ Դատախազությունն ուսումնասիրում է նաև Սերժ Սարգսյանի եղբոր՝ հետախուզման մեջ գտնվող Լևոն Սարգսյանի, նրա դստեր, որդու, թիկնազոր պետ Վաչագան Ղազարյանի, Պետական գույքի կառավարման վարչության նախկին պետ, ԱԺ նախկին նախագահ Գալուստ Սահակյանի որդու՝ Արման Սահակյանի, բնապահպանության նախկին նախարար Արամ Հարությունյանի, ՀՀ նախկին ոստիկանապետ Վլադիմիր Գասպարյանի և նրա ընտանիքին պատկանող գույքերի օրինականությունը։
Ռոզա Վարդանյան
