Քաղաքականություն
09.12.2021 | 20:51
Վաղ տվյալները ցույց են տալիս, որ կորոնավիրուսի «օմիկրոն» շտամը կարող է ավելի հեշտությամբ վարակել այն մարդկանց, որոնք նախկինում արդեն վարակվել են կամ պատվաստվել, քան նախորդ տարբերակները, բայց կարող է նաև հիվանդության ավելի մեղմ ընթացք առաջացնել։ Այս մասին հայտարարել է Առողջապահության համաշխարհային կազմակերպության (ԱՀԿ) ղեկավար Թեդրոս Ադհանոմ Գեբրեյեսուսը, գրում է Al Jazeera-ն:
«Հարավային Աֆրիկայից ստացված տվյալները վկայում են «օմիկրոն»-ով կրկնակի վարակվելու ռիսկի մեծացման մասին»,- լրագրողներին ասել է ԱՀԿ ղեկավարը՝ հավելելով, որ կան նաև որոշ ապացույցներ, որ «օմիկրոն»-ն ավելի մեղմ հիվանդություն է առաջացնում, քան «դելտա»-ն:
Նա, սակայն, ընդգծել է, որ ավելի շատ տվյալներ են անհրաժեշտ՝ նախքան հաստատուն եզրակացություններ անելը, և հորդորել է երկրներին ամենուր ուժեղացնել հսկողությունը՝ օգնելու ավելի հստակ պատկերացում կազմել, թե ինչպես է «օմիկրոն»-ն իրեն դրսևորում:
Հուսադրող գնահատականները եղան այն ժամանակ, երբ գլոբալ մտահոգությունն աճեց խիստ մուտացիայի ենթարկված տարբերակի վերաբերյալ, որը տասնյակ ազգերի ստիպեց կրկին սահմանային սահմանափակումներ կիրառել և բարձրացրել տնտեսության վրա բացասական ազդեցություն ունեցող արգելափակումներին վերադառնալու հնարավորությունը:
Նույնիսկ եթե պարզվի, որ «օմիկրոն»-ն ավելի քիչ ծանր հիվանդություն է առաջացնում, Թեդրոսը նախազգուշացրել է վիրուսի դեմ զգոնությունը թուլացնելու վտանգի մասին:
«Հիմա ցանկացած ինքնագոհություն կարժենա կյանքեր»,- զգուշացրել է նա:
Տաթև Ֆռանգյան
