Սաակաշվիլիի առողջական վիճակը խարխլվել է բանտում նրա նկատմամբ անմարդկային վերաբերմունքի պատճառով․ ուկրաինացի պատգամավոր

Վրաստանի նախկին նախագահ Միխայիլ Սաակաշվիլիի առողջական վիճակը, որը հացադուլից հետո գտնվում է զինվորական հոսպիտալում, խարխլվել է բանտում նրա նկատմամբ անմարդկային վերաբերմունքի պատճառով։ Այս մասին ասել է նրա ընկերուհին՝ Ուկրաինայի Գերագույն ռադայի «Ժողովրդի ծառա» խմբակցության պատգամավոր Ելիզավետա Յասկոն, գրում է ՌԻԱ Նովոստին։

Շաբաթ Սաակաշվիլին դադարեցրել է 50-օրյա հացադուլը և հիմա բուժման կուրս է անցնում Գորիի զինվորական հոսպիտալում։

«Ցավոք, նա թույլ է, նրա առողջական վիճակը քայքայվել է անմարդկային վերաբերմունքից, ֆիզիկական և հոգեբանական բռնությունից հետո, որին նա ենթարկվել է Գլդանի բանտում, ունի տարբեր ախտանիշներ, որոնցից տառապում է։ Կարծում եմ, որ երկար ժամանակ կպահանջվի, որպեսզի նա վերականգնի առողջությունը»,- լրագրողներին ասել է Յասկոն։

Սաակաշվիլին ձերբակալվել էր հոկտեմբերի 1-ին Վրաստանում։ Այդ օրվանից նա հացադուլ էր հայտարարել։ Վրաստանի նախկին նախագահը հեռակա կարգով դատապարտվել էր բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու գործերով։ Առաջին դեպքում Սաակաշվիլին դատապարտվել է երեք տարվա ազատազրկման, երկրորդում՝ վեց տարվա։ Բացի այդ, նա ներգրավված է 2007 թվականի նոյեմբերի 7-ի ընդդիմության հանրահավաքը ցրելու, «Իմեդի» հեռուստաընկերության վրա հարձակման և պետբյուջեի միջոցների յուրացման գործերով, որոնք դեռ քննվում են դատարանների կողմից։

Սաակաշվիլին չի ընդունում իրեն ներկայացված մեղադրանքներըը։ Նրա կողմնակիցները բողոքի ցույցեր են անցկացնում Վրաստանի տարբեր քաղաքներում՝ պահանջելով ազատ արձակել նախկին նախագահին։

Սակայն Վրաստանի իշխանությունները հրաժարվում են ազատ արձակել Սաակաշվիլիին. վարչապետ Իրակլի Ղարիբաշվիլին հայտարարել է, որ Սաակաշվիլին դեռ երկար կմնա բանտում և կկրի իր պատժի ողջ ժամկետը։

Տաթև Ֆռանգյան