Կրեմլն արձագանքեց․ նոր պատերազմն ինչպե՞ս կանխել․ զրույց Հայկ Սուքիասյանի հետ․ ՏԵՍԱՆՅՈՒԹ

Factor TV-ի հարցազրույցը քաղաքագետ Հայկ Սուքիասյանի հետ

–Վերջին տեղեկությունը եկավ Կրեմլից. Պուտինի խոսնակը՝ Դմիտրի Պեսկովը հայտնում է, որ իրավիճակի կայունացման միակ ճանապարհը եռակողմ հայտարարությունների կատարումն է։ Նա հայտարարում է, որ Պուտինի, Ալիևի և Փաշինյանի եռակողմ շփման համար անհրաժեշտ է բոլոր կողմերի պատրաստակամությունը և համաձայնությունը։ Եթե վերջին ամիսների ինֆորմացիան էլ գումարենք այս հայտարարությանը, ապա կհիշենք, որ ռուսական կողմն արդեն իսկ որպես հաստատուն փաստ էր ներկայացրել նոյեմբերի 9-ին կամ դրա շրջակայքում Ալիև-Փաշինյան-Պուտին հանդիպումը,  սակայն վարչապետ Փաշինյանը հայտարարեց, որ հայկական կողմի համար կարևոր է այդ հանդիպումից սպասվող արդյունքը, օրակարգը, ինչպես նաև այդ հանդիպման սիմվոլիկան։ Հիմա ի՞նչ է սա նշանակում:

–Նախ՝ դա հերթական տափակ հայտարարությունն է նոյեմբերի 9-ի կետերը կատարելու վերաբերյալ, և այդպիսի մի տափակ հայտարարություն էլ մենք կարող ենք անել՝ դո՛ւք էլ կատարեք ձեր պարտավորությունները: Ինչպես տեսնում ենք՝ Հայաստանի Հանրապետությունը գերազանցիկի նման կատարում է իր պարտականությունները, Ռուսաստանը թող հայտարարի, թե ինքը ինչու է կիսատ-պռատ կատարում իր պարտականությունները, որովհետև իր ներկայությամբ գնդակահարում են քաղաքացիական անձանց, հետևապես իր խաղաղարարության գործընթացը պետք է մեկնաբանի՝ արդյո՞ք խաղաղարարության միջազգային շրջանակներին համապատասխանում է, թե՞ ոչ: Իր պարտականությունները չի կատարում նաև Ադրբեջանը կամ կատարում է կիսատ-պռատ։ Բայց կա երկրորդ հարցը՝ ի՞նչ կապ ունի այդ հայտարարությունը Հայաստանի Հանրապետության տարածք ներխուժելու հետ։

-Ասում են՝ իրավիճակը կկայունանա, ադրբեջանցիները չեն ներխուժի, եթե եռակողմ հանդիպումը տեղի ունենա:

-Եռակողմ հայտարարությունները մեծապես վերաբերում են Արցախին և պատերազմի դադարեցմանը, կա մեկ-երկու դրույթ, որ վերաբերում է ընդհանրապես տարածաշրջանի ապաշրջափակմանը, բայց իրենք պետք է հասկանան, որ դա շատ երկար գործընթաց է, և իրենք դա շատ լավ են հասկանում, Հայաստանը իր պարտավորությունները կատարել է և կատարում է: Հետևապես, դա հերթական տափակ հայտարարությունն է, բայց նաև հերթական ապացույցն է այն բանի, որ Ռուսաստանը խուսափում է կատարել իր վրա դրված դաշնակցի պարտականությունները:

Մանրամասները՝ տեսանյութում:

Ռոբերտ Անանյան