«Սնդիկ փարթիներին մասնակցելու ցանկություն չունենք»․ ընդդիմությունը բոյկոտեց ԱԺ նիստը․ ՏԵՍԱՆՅՈՒԹ

Մեկնարկել է Ազգային ժողովի հերթական նստաշրջանը: Ընդդիմադիր «Հայաստան» խմբակցության ղեկավար Սեյրան Օհանյանը հայտարարեց, որ սահմանային լարվածությունից հետո ընդդիմությունը շարունակաբար փորձել է, օգտվելով իր սահմանադրական իրավունքներից, ԱԺ օրակարգ բերել ու արտահերթ քննարկման հարց դարձնել հայ ժողովրդի կենսական շահերի ոտնահարման փաստերը:

«Կառավարությունից պահանջում էինք հանրությանը լիարժեք տեղեկություններ տալ, որովհետև այս ամենը կառավարության բացթողումների ու օրենսդիրի պատշաճ վերահսկողության բացակայության պատճառով է, սակայն քաղաքական մեծամասնությունը, չարաշահելով իր լիազորությունները, ապօրինաբար խոչընդոտեց այս նախաձեռնությունը, ավելին, իրավական ամենաթողության պայմաններում կրկնակի կալանավորվեց այս պահանջին միացած սյունեցի պատգամավոր Արթուր Սարգսյանը»,- նշեց Սեյրան Օհանյանը:

Նա հայտարարեց, որ դատապարտելով իրավական այս «բեսպրեդելը» ու, ի նշան բողոքի, «Հայաստան» խմբակցությունը չի մասնակցելու հերթկան նիստերի աշխատանքներին:

ԱԺ «Պատիվ ունեմ» խմբակցության քարտուղար Հայկ Մամիջանյանը հավելեց, որ ԱԺ օրակարգում այսօր «Սնդիկի մասին օրենքի» «կարևորագույն» կետի ներառումն է:

« «Պատիվ ունեմ» խմբակցությունը կվերադառանա նիստերի դահլիճ այն ժամանակ, երբ մեր երկրի առաջ ծառացած խնդիրները կքննարկվեն ըստ կարևորության ու ըստ օրհասական վտանգի, իսկ ձեր սնդիկ փարթիներին մասնակցելու ցանկություն չունենք»,- նշեց Մամիջանայանը:

Մանրամասները՝ տեսանյութում: