19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
ԱՄՆ-ը նախազգուշացրել է ԵՄ-ին, որ ՌԴ-ն կարող է ներխուժել Ուկրաինա․ Bloomberg
Քաղաքականություն
12.11.2021 | 15:11
ԱՄՆ-ը կիսվել է իր եվրոպացի դաշնակիցների հետ մտահոգություններով առ այն, որ Ռուսաստանը կարող է դիտարկել Ուկրաինա ներխուժելու հնարավորությունը միգրանտների հետ կապված ճգնաժամի և էներգակիրների մատակարարման շուրջ Մոսկվայի և ԵՄ-ի միջև աճող լարվածության ֆոնին, գրում է Bloomberg-ը:
Ինչպես գործակալությանը հայտնել են միանգամից մի քանի իրազեկ աղբյուրներ, այս մտավախությունները հիմնված են ինչ-որ տեղեկությունների վրա, որոնք ԱՄՆ-ը դեռևս չի կիսվել եվրոպական երկրների կառավարությունների հետ։ Այս տեղեկությունը հաստատվում է ապացույցներով, որոնք արդեն հրապարակվել են, գրում է Bloomberg-ը։
Սպիտակ տունը դեռ չի մեկնաբանել այս տեղեկությունը։
Ռուսաստանը պնդում է, որ իր տարածքում զորքերի տեղակայումն իր ներքին գործն է, և հերքում է ագրեսիվ մտադրությունները՝ միաժամանակ մեղադրելով ԱՄՆ-ին սադրիչ գործողությունների մեջ Սև ծովում իր սահմանների մոտ, ուր այս շաբաթ մուտք է գործել ամերիկյան ռազմանավերի խումբ։
Նմանատիպ լարվածություն էր գրանցվել նաև այս գարնանը, երբ ԱՄՆ-ը և ՆԱՏՕ-ն մեղադրեցին Ռուսաստանին Ուկրաինայի սահմանի մոտ ռազմական ուժերի, տանկերի և մարտական ինքնաթիռների զգալի կուտակման մեջ: Այս լարվածությունը թուլացավ միայն այն բանից հետո, երբ ԱՄՆ նախագահ Ջո Բայդենը զանգահարեց Վլադիմիր Պուտինին և առաջարկեց համատեղ հանդիպում անցկացնել, որը տեղի է ունեցավ հունիսին, հիշեցնում է գործակալությունը։
The Washington Post-ն առաջինն էր, որը հայտնել էր Ուկրաինայի հետ սահմանի մոտ ռուսական ուժերի նոր կուտակման մասին: Ռազմական վերլուծաբանները, որոնց հետ նա հարցազրույց է վերցրել, պնդում են, որ Ռուսաստանը սկսել է զորքեր կուտակել Ուկրաինայի հետ սահմանին սեպտեմբերի կեսերից:
Ռուս-բելառուսական «Զապադ-2021» համատեղ զորավարժությունների ավարտից հետո զինվորականները չեն վերադարձվել իրենց սովորական տեղակայման վայրեր, այլ սկսել են տեղափոխվել ռուս-ուկրաինական սահման։ Անցյալ շաբաթ Ուկրաինայի պաշտպանության նախարարությունը հայտարարեց, որ այժմ սահմանի մոտ մոտ 90 հազար ռուս զինվորական կա։
Նախօրեին ԱՄՆ պետքարտուղար Էնթոնի Բլինքենը հայտարարել էր, որ Մոսկվայի մտադրությունները ուկրաինական սահմանի մոտ զորքերի վերջին տեղաշարժի հետ կապված մնում են անհասկանալի, սակայն Ուկրաինայի դեմ նոր ագրեսիա սանձազերծելը լուրջ սխալ կլինի Ռուսաստանի համար։
Տաթև Ֆռանգյան
