15.12.2025 | 15:31
Արարատի մարզի որոշ շրջաններում 24 ժամ ջուր չի լինի
Կառավարության շենքի մոտից բերման է ենթարկվել 16 քաղաքացի
Հասարակություն
11.11.2021 | 12:52
Քիչ առաջ Կառավարության շենքի մոտից ոստիկանական տարբեր բաժիններ բերման են ենթարկվել 16 քաղաքացիներ։ Այս մասին Factor.am-ի հետ զրույցում հայտնեց Ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը։ Նրա խոսքով՝ ակցիայի մասնակիցները բերման են ենթարկվել ոստիկանի օրինական պահանջը չկատարելու համար։
Նշենք, որ այս պահին Կառավարության շենքի դիմաց իրավիճակը շարունակում է լարված մնալ։ Այստեղ առավոտից հավաքվել են ԱԺ «Հայաստան» և «Պատիվ ունեմ» խմբակցությունների պատգամավորները, որոնք բողոքի ակցիա են իրականացնում Գորիս-Կապան ճանապարհին ադրբեջանական մաքսակետերի տեղադրման դեմ։ Նրանք փորձեցին մուտք գործել Կառավարության շենք, սակայն ոստիկանները թույլ չտվեցին, ինչի հետևանքով հրմշտոց սկսվեց:
Հիշեցնենք՝ Անվտանգության խորհրդի քարտուղար Արմեն Գրիգորյանը նախօրեին Հանրային հեռուստաընկերությանը տված հարցազրույցում տեղեկացրեց, որ ադրբեջանական կողմը գիշերը 00։00-ից Գորիս-Կապան ճանապարհի հատվածում կիրականացնի սահմանային և մաքսային հսկողության գործառույթ, այսինքն՝ մաքսակետեր կտեղադրի։
«Ուզում եմ հայտարարել, որ հայկական կողմը ևս համապատասխան քայլեր կձեռնարկի, այսինքն՝ ճանապարհի այդ հատվածում ևս կտեղադրի մաքսային և սահմանային հսկողության գործառույթներ իրականացնող կետեր»,- նշեց Գրիգորյանը։
Ռոզա Վարդանյան
