Պետք է քաղաքական պատժամիջոցներ կիրառվեն Ալիևի և նրա ընտանիքի նկատմամբ. իրավապաշտպան. ՏԵՍԱՆՅՈՒԹ

Բռնի անհետացումները, միտումնավոր սպանությունները և խոշտանգումները միջազգային հանցագործություններ են և պահանջում են ունիվերսալ իրավազորության շրջանակներում հետաքննություն… Մենք պետք է ակտիվ աշխատանքներ կատարենք, որպեսզի այլ երկրներում նախաձեռնվեն հետապնդումներ և միջազգային համագործակցության շրջանակներում վերահսկման ներքո վերցվեն այս հանցագործություններում ներգրավվածություն ունեցած անձինք, ձերբակալվեն և ներկայացվեն դատարաններին: Այս մասին այսօր հրավիրած ասուլիսում ասաց ՄԻԵԴ-ում հայ գերիների շահերը ներկայացնող փաստաբան Սիրանուշ Սահակյանը։

« Ալիևը պատերազմական հանցագործության մաս է կազմում. ռազմագերիների թվաքանակը կեղծելը, թաքցնելը կամ ռազմագերիներին անհապաղ ազատ չարձակելը ինքնին պատերազմական հանցագործություն է։ Իսկ մենք տեսնում ենք, որ պատվերը տրվել է հենց Ալիևի կողմից, այսինքն՝ այս գործընթացում խոչընդոտները հենց նախաձեռնվել են Ալիևի կողմից, ով հրապարակային հայտարարեց, որ այլևս ռազմագերիներ չկան։ Ավելին, նա պիտակավորեց ռազմագերիներին որպես հանցագործներ՝ խոչընդոտելով նրանց անհապաղ հայրենադարձումը։ Այսինքն՝ Ալիևի անմիջական որոշման հիման վրա թաքցվում է ռազմագերիների իրական թիվը։

Իսկ միջազգային փաստաթղթերը նշում են՝ ռազմագերիների հայրենադարձման չհիմնավորված պատճառաբանությունները պատերազմական հանցագործություններ են։ Կարծում եմ՝ հենց այս պատերազմական հանցագործության առնչությամբ կարելի է և պետք է քաղաքական պատժամիջոցներ կիրառվեն Ալիևի, նրա ընտանիքի անդամների, նրա հետ փոխկապակցված բիզնեսների նկատմամբ։ Ուղղակի սրանք քաղաքական պատժամնիջոցներ են և այստեղ պետք է լրջագույն աշխատանք տարվի միջազգային կառույցների հետ, որպեսզի նրանք գիտակցեն Հայաստանի հետ համընկնող իրենց շահերը և որոշեն լուրջ մոտեցումներ ցուցաբերել Ադրբեջանի նկատմամբ, ում հետ ունեն տնտեսական շահեր»,- նշեց Սահակյանը։

Մանրամասները՝ տեսանյութում: