Մտահոգություն կա, որ «Երևան» հիմնադրամի շուրջ կոռուպցիոն սխեմա է գործում. Արայիկ Հարությունյանը պատրաստվում է դատի տալ «Երևան» հիմնադրամին և ՊԵԿ-ին. ՏԵՍԱՆՅՈՒԹ

Երևանի ավագանու «Ելք» խմբակցության անդամ Արայիկ Հարությունյանը պատրաստվում է դատի տալ «Երևան» հիմնադրամին և Կառավարությանն առընթեր Պետական եկամուտների կոմիտեին: Factor.am-ի հետ զրույցում Արայիկ Հարությունյանը հայտարարեց՝ կասկածներ ունեն, որ «Երևան հիմնադրամի» ֆինանսական միջոցները փոխանցվում են կոռուպցիոն ճանապարհով:

«Քաղաքացիների մեծամասնությունը, որոնք այս կամ այն կերպ առնչություն են ունենում քաղաքապետարանի հետ, մասնավորապես՝ շինարարության և սեփականաշնորհման հետ կապված խնդիրներ են ունենում, նրանք բացի այն, որ պետական համապատասխան վճարումներ են կատարում, նրանց նաև հորդորում են որոշակի գումար փոխանցել «Երևան» հիմնադրամին»,- ասաց Արայիկ Հարությունյանը՝ նշելով. «Սա, իհարկե, մտահոգություն է առաջացնում այն առումով, որ կարող է իրենից լուրջ կոռուպցիոն սխեմա ներկայացնել»:

Արայիկ Հարությունյանը հայտնեց, որ փորձել է «Երևան» հիմնադրամից ստանալ 100 հազար դրամ և ավելի գումար ստացած քաղաքացիների ցուցակը, որպեսզի համադրի սեփականաշնորհում իրականացրած քաղաքացիների ցուցակների հետ՝ պարզելու համար, թե որքանով է իրենց ունեցած մտահոգությունը համապատասխանում իրականությանը: Սեփականշնորհում իրականացրած քաղաքացիների ցուցակը ավագանու ընդդիմադիր անդամին հաջողվել է ստանալ, իսկ հիմնադրամին 100 հազար և ավելի գումար փոխանցածների ցուցակն այդպես էլ ստանալ չի հաջողվել:

«Մենք փորձեցինք այդ ցուցակները ստանալ պատգամավորական հարցմամբ, սակայն պատգամավորին նույնպես մերժեցին՝ հղում անելով անձնական տվյալների գաղտնիությանը: Դիմեցինք նաև ՊԵԿ-ին, որովհետև ՊԵԿ-ն ի պաշտոնե հսկողություն է իրականացնում հիմնադրամների ֆինանսական շարժերի նկատմամբ, բացի այդ, ՊԵԿ նախագահի հրաման կա, որով հիմնադրամները պետք է ներկայացնեն նվիրատուների ցուցակները»,- շարունակեց Հարությունյանը:

Նրա փոխանցմամբ՝ Պետական եկամուտների կոմիտե ևս հարցում են ուղարկել և պարզել՝ «Երևան» հիմնադրամն այդ ցուցակը չի ներկայացրել նշված կառույցին, ՊԵԿ-ն էլ իր հերթին հետևողականություն չի ցուցաբերել՝ ցուցակները ստանալու համար:

Երևանի ավագանու ընդդիմադիր անդամն ասաց՝ թեմային անդրադառնալու անհրաժեշտություն է առաջացել այն բանից հետո, երբ քաղաքացիներից, որոնք չեն ցանկացել ներկայանալ, ահազանգ են ստացել այն մասին, որ իրենց պարտադրվել է գումարներ փոխանցել «Երևան» հիմնադրամին:

Արայիկ Հարությունյանն ասաց, որ դատական հայցով պահանջելու են իրենց տրամադրել այց ցուցակները։

Հարցազրույցն ամբողջությամբ՝ տեսանյութում:

Շողիկ Գալստյան