Դուք հին իշխանություն եք, դուք ունեք կուտակած խնդիրների հսկայական ծավալ․ Ղազինյանը՝ իշխանություններին. ՏԵՍԱՆՅՈՒԹ

Գուցե ձևավորվել է մի այնպիսի համոզմունք, թե ընդդիմությունը տենչում է ունենալ ԱԺ փոխնախագահ, բացարձակապես այդպես չէ: Մենք որդեգրել ենք սահմանադրականության ճանապարհը և չենք շեղվում այդ Ճանապարհից: Այս մասին այսօր ԱԺ-ում իր ելույթի ժամանակ ասաց «Հայաստան» դաշինքի պատգամավոր Արթուր Ղազինյանը:

Նրա խոսքով՝ իշխանության պարտականությունն է ապահովել երկրի տարածքային ամբողջականությունը, սահմանների անխախտելիությունը, ինքնիշխանությունը: Իշխանությունն է պատասխանատու երկրում տեղի ունեցող իրադարձությունների համար, նաև այսօր այստեղ տեղի ունեցողի համար:

«Ձա՞յն խնդրել՝ ումի՞ց, ինչի՞ համար»,- նշեց Ղազինյանը՝ հավելելով, որ պաշտոն ստանալու խնդիր չունեն. այսօր կա մեկ խնդիր՝ դա երկրի տարածքային ամբողջականության պաշտպանությունն է:

«Դուք եկել եք, ավանսով խոսում եք կառուցողականության մասին: Մենք երեք տարի տեսել ենք ձեզ, նոր չեք, հին եք այլևս, դուք հին իշխանություն եք, դուք ունեք կուտակած խնդիրների հսկայական ծավալ, սայթաքումների, սխալների, բացթողումների շատ մեծ բեռ: Դուք եք պատասխանատու այս ամեն ինչի համար, նաև նրա համար, ինչ կատարվում է այս դահլիճում, ընդդիմությունը առաջադրել է միասնական թեկնածու, այլևս անելիք չունի… Դուք այստեղ առաքելություն ունեք, կատարեք ձեր ստանձնած հանձնառությունները: Մենք չենք խնդրելու ընտրել մեր առաջադրած թեկնածուին: Կա՛մ կընտրեք, կա՛մ չէ. դա ձեր իրավունքն է: Իմ խնդրանքն է, պահանջն ու հորդորը, որ Ժողովրդին հույս ներշնչենք, որ ինչ-որ բան հնարավոր է փոխել այս երկրում, հնարավոր է կարգի բերել»:

Մանրամասները՝ տեսանյութում: