17.12.2025 | 19:14
Աստղաձորի տներից մեկում հրդեհ է բռնկվել
Ադրբեջանը Շուշի տանող երկաթուղի է նախագծում
Քաղաքականություն
23.07.2021 | 16:38
«Ադրբեջանական երկաթուղիներ» ընկերությունը սկսել է ադրբեջանական օկուպացիայի տակ գտնվող Շուշի տանող երկաթուղու նախագծման աշխատանքները։ Այս մասին հայտարարել է ընկերության ղեկավար Ջավիդ Գուրբանովը։
«Թուրքական Kaylon ընկերության մասնակցությամբ արդեն աշխատանքներ են տարվում Շուշի տանող երկաթուղու նախագծման ուղղությամբ»,-լրագրողներին ասել է Գուրբանովը։ Ըստ նրա՝ երեք ուղղությամբ են իրականացվում երկաթուղու նախագծման և կառուցման աշխատանքներ՝ Հորադիզ-Նախիջևան, Շուշի և Աղդամ։ Ըստ այդմարդեն սկսվել են Աղդամ (Աղդամ-Բարդա)գնացող երկաթուղու կառուցմա շինարարական աշխատանքները, որոնք տեղական տեղական ընկերություն է իրականացնում։
Ի դեպ, թուրքական Kaylon ընկերությունը, որի մասին խոսել է Գուրբանովը, Ադրբեջանում տարբեր ծրագրեր է իրականացնում։ Հենց այս ընկերությունն է այժմ կառուցում Հորադիզ-Մինջիվան-Աղբենդ ավտոճանապարհը, ինչպես նաև նույն երթուղով երկաթուղին։
Ամիսներ առաջ էլ «Kalyon Group»-ի ղեկավար Մեհմեթ Քալոնջուն Ադրբեջանի տրանսպորտի, կապի և բարձր տեխնոլոգիաների նախարար Ռաշադ Նաբիևին և Թուրքիայի տրանսպորտի և ենթակառուցվածքների նախարար Ադիլ Կարաիսմայիլօղլուին ծանոթացնում էր նշյալ մայրուղու կառուցման նախագծին։
Հավելենք, որ «Kalyon Group»-ը հիմնադիրն է թուրք հայտնի գործարար Հասան Քալոնջուն։ Այս ընտանիքը սերտ կապեր ունի Թուրքիայի նախագահ Ռեջեփ Թայիփ էրդողանի հետ։ Հենց Էրդողանի իշխանության գալուց հետո այս ընկերությունը սկսեց մեծ հաջողություններ գրանցել՝ պետական մրցույթներում հաղթելով, այդ թվում՝ վիճահարույց ծրագրերում, ինչպիսիք են Ստամբուլի հյուսիսում երրորդ օդանավակայանի կառուցումը, քաղաքի մետրոն և ստորգետնյա թունելը, ինչը Թաքսիմի հրապարակում երիտասարդների բողողքի ակցիաների պատճառ էր դարձել։
Թուրքիայի նախագահը բաց չի թողնում նաև Հասան Քալոնջուի զավակների հարսանեկան արարողությունները, որոնց մշտական պատվավոր հյուրն է։ Կան նաև տարբեր տեղեկություններ, որ Kaylon-ը ներգրավված է էրդողանի տարբեր կասկածելի գործարքներում։
Էմմա Չոբանյան
