Հնդկական շտամը գրոհում է, հիվանդանոցներում ազատ մահճակալներ չկան․ ինչ իրավիճակ է Վրաստանում

Վրաստանում կորոնավիրուսի հնդկական շտամով վարակված մարդկանց թիվը շարունակում է աճել, կլինիկաներն արդեն դժվարությամբ են հաղթահարում հիվանդների հոսքը: Թբիլիսիի հանրապետական հիվանդանոցում, չնայած այն հանգամանքին, որ գրեթե ամեն օր նոր մահճակալներ են ավելանում, ազատ տեղեր չկան, գրում է Sputnik-ի վրացական ծառայությունը:

Ըստ կլինիկայի փոխտնօրեն Ջավարա Ուգրեխելիձեի՝ բոլոր 350 մահճակալները, որոնք մոբիլիզացվել են վարակված հիվանդների համար, զբաղված են: Ինչ վերաբերում է մանկական մահճակալներին, ապա կլինիկան արդեն պատրաստ է նաև երեխաների ընդունել:

Մցխեթայի բժշկական կենտրոնի տնօրեն Լիկա Մումլաձեի խոսքով՝ քովիդ-հիվանդների կեսից ավելին, որոնք հոսպիտալացման կարիք ունեն, վարակված են հնդկական շտամով:

«Դեպքերի թվի աճի հետ մեկտեղ՝ բարդանում է նաև իրավիճակը կլինիկայում, այս փուլում մեզ մոտ ստացիոնար բուժում է ստանում 112 հիվանդ։ Հաշվի առնելով հիվանդության ընթացքը, կլինիկական պատկերը, տարածումն ու անամնեզը՝ մենք կարող ենք ենթադրել, որ հոսպիտալացվածների 70%-ը վարակված է հնդկական շտամով»,- հայտնել է Մումլաձեն։

Բժիշկների խոսքով՝ հնդկական շտամն առանձնանում է սովորական գրիպին բնորոշ ախտանիշներով, և մարդիկ հաճախ շփոթում են կորոնավիրուսը սովորական մրսածության հետ: Բժիշկները բոլորին հորդորում են զգույշ լինել, ախտանիշների առկայության դեպքում թեստավորվել և ինքնամեկուսանալ։

Ըստ համաճարակաբանների՝ Վրաստանում հենց հնդկական շտամի տարածման պատճառով է, որ կլինիկաներում մահճակալների պակաս կա: Հաղորդվում է, որ հնդկական շտամն ավելի շատ տարածվում է երեխաների և երիտասարդների շրջանում: Այն 50%-ով ավելի վարակիչ է, քան բրիտանական շտամը, որը ժամանակին համարվում էր 50%-ով ավելի վարակիչ, քան չինականը:

Հավելենք, որ հուլիսի 20-ի ժամը 10:00-ի դրությամբ՝ Վրաստանում արձանագրվել է կորոնավիրուսով վարակման 2616 նոր դեպք: Դեպքերի ընդհանուր քանակը երկրում 390․945 է:

Տաթև Ֆռանգյան