08.11.2024 | 02:01
8-0. «Նոա»-ն չկարողացավ դիմակայել «Չելսի»-ին
Կիպրոսում անտառային հրդեհներ են մոլեգնում․ երկրի իշխանություններն այն անվանել են աննախադեպ երկրի պատմության մեջ
Քաղաքականություն
05.07.2021 | 17:19
Կիպրոսի իշխանություններին հաջողվել է մասամբ մարել խոշոր անտառային հրդեհը, որը բռնկվել էր կղզու հարավային մասում։ Փրկարարները, սակայն, մտավախություն ունեն, որ ուժեղ քամին կարող է կրկին տարածել կրակը։ Միջերկրածովյան երկրները արտակարգ կերպով Կիպրոս են ուղարկում հրշեջներ ու տեխնիկա, իսկ երկրի նախագահն այս աղետն անվանել է աննախադեպ հանրապետության պատմության մեջ:
Հրդեհաշիջման աշխատանքներին մասնակցելու համար հրշեջ-փրկարարների, օդանավեր և սարքավորումներ ուղարկելու մասին հայտնել են Հունաստանը, Իտալիան և Իսրայելը: Կղզում տեղակայված բրիտանացի զինվորականներն ակտիվորեն մասնակցում են ունեցել կրակի մարման աշխատանքներին։
Կիպրոսի ՆԳՆ տեղեկությունների համաձայն՝ հրդեհի շրջանում հայտնաբերվել է 4 դի։ Ըստ ամենայնի, զոհվածները եգիպտացի գյուղատնտեսներ էին, որոնք շաբաթ օրվանից անհետ կորած էին համարվում այն բանից հետո, ինչ նրանց մեքենան այրված էր հայտնաբերվել։
Շաբաթ կեսօրին հրդեհը բռնկվել է Լիմասոլի շրջանի Արակապաս գյուղի մոտակայքում, իսկ կիրակի այն արդեն տարածվել է դեպի հարևան գյուղեր՝ Եպտագոնիա, Ակապնոս, Հորաս, Մելինի և Սիկոպետրաս:
«Այն պտտահողմի նման սլացավ ու ոչնչացրեց ամեն ինչ»,- պատմել է Արակապաս համայնքի ղեկավար Վասոս Վասիլիուն։
Հրշեջ-փրկարարները փորձել են կանխել կրակի տարածումը լեռնային տեղանքով և Մախերաս անտառով:
Կրակի բոցերը, ուժեղ քամու ուղեկցությամբ, տարածվել են Լիմասոլից հյուսիս-արևելք. մի քանի գյուղերի բնակիչներ տարհանվել են, տասնյակ տներ վնասվել են, դրանց մի մասն ամբողջությամբ այրվել է:
«Մենք խոսում ենք ողբերգության մասին, որը երբևէ նախկինում չի գրանցվել՝ բացառությամբ 1974 թվականի թուրքական զորքերի ներխուժման ժամանակաշրջանի։ Հաստատվում է, որ սա ամենաավերիչ հրդեհներից մեկն է և ցավոք, մարդկային կորուստներով»,- ասել է երկրի ղեկավարը հրդեհների դեմ պայքարի համակարգող կենտրոն այցի ժամանակ։
Տաթև Ֆռանգյան
