19.11.2024 | 12:36
Փաշինյանից «sms» չեմ ստացել, մենք հերթական ընտրություններին ենք պատրաստվում. Փամբուխչյան. ՏԵՍԱՆՅՈՒԹ
Արցախի հարցը չի կարող լուծվել ռուս-թուրքական գործարքների հիման վրա․ Արա Պապյան. ՏԵՍԱՆՅՈՒԹ
Քաղաքականություն
18.06.2021 | 13:06
Արցախի հարցը չի կարող լուծվել ռուս-թուրքական գործարքների հիման վրա, պետք է լուծվի միջազգային իրավունքի հիման վրա։ Այս մասին այսօր հրավիրած ասուլիսում ասաց «Ազգային ժողովրդավարական բևեռ» նախաձեռնության անդամ Արա Պապյանը։
«Ազգային ժողովրդավարական բևեռն» Արցախի հարցի լուծումը դիտարկում է Հայաստանի Հանրապետության իրավահաջորդության և ՀՀ տարածքային ամբողջականության վերահաստատման ճանապարհով։
Բոլոր խոսակցությունները՝ ժողովուրդների ինքնորոշման մասին, Ադրբեջանի կազմում Արցախի մնալու մասին, ինչ կարգավիճակով էլ այն լինի, դրանք հակաօրինական են, դեմ են միջազգային իրավունքին և հակասահմանադրական են։
Արցախը երբևէ օրինապես չի եղել Ադրբեջանի կազմում, և Ադրբեջանն ինքը 1991 թվականի հոկտեմբերի 18-ին հրաժարվել է ՍՍՀՄ իրավաքաղաքական ժառանգությունից։ Հետևաբար, մենք դիտարկում ենք, որ խնդիրը պետք է լուծվի միջազգային իրավունքի հիման վրա։ Այսինքն՝ պիտի հստակեցվի, թե անկախ Հայաստանի և անկախ Ադրբեջանի միջև որն է եղել ճանաչված սահմանը, և դրա հիման վրա պետք է տեղի ունենա, այսպես կոչված դելիմիտացիան և դեմարկացիան։ Մինչև հստակեցումը, թե որն է իրավական հիմքը, ցանկացած նմանատիպ գործողություն հակաօրինական է»,- նշեց Պապյանը։
Արա Պապյանն ընդգծեց, որ կա ընդամենը մեկ փաստաթուղթ, որով միջազգային իրավասու կառույցը ճանաչել է Հայաստանի և Ադրբեջանի միջև եղած սահմանը։ «Դա ազգերի լիգայի խորհրդի կողմից ստեղծված հատուկ հանձնաժողովի զեկույց-առաջարկն է՝ թվագրված 1920 թվականի փետրվարի 24-ով։ Եվ դա ԼՂԻՄ-ը հարակից տարածքներով ճանաչում է Հայաստանի Հանրապետության մաս։
Այո՛, մենք կողմնակից ենք միջազգային իրավունքի հիման վրա խնդիրը լուծելուն, բայց ոչ այլ չակերտավոր իրավունքի. փորձ է արվում սովետա-ստալինյան վարչական սահմանները ներկայացնել որպես միջպետական սահմաններ կամ խնդրի օրինական լուծում։
Եթե Ադբեջանը վստահ է, ինչպես ինքն է ասում, որ Ադրբեջանի տարածքի մաս է հանդիսանում և իբր միջազգայնորեն ճանաչված է այդպիսին, ՄԱԿ-ի դատարանի ստատուտի 35-րդ հոդվածի հիման վրա կարելի է համատեղ դիմել դատարան, և դատարանը կհստակեցնի՝ որ փաստաթղթերի հիման վրա է տեղի ունեցել սահմանանշումը, և հետևաբար՝ խնդիրը խաղաղ լուծում կունենա։
Իսկ առայժմ, որպես անցողիկ փուլ, բանակցությունները պետք է վերադառնան Մինսկի խմբի եռանախագահության շրջան։ Խնդիրը չի կարող լուծվել ռուս-թուրքական գործարքների հիման վրա։ Խաղաղապահները չպետք է լինեն ինքնակոչներ, պետք է ունենան խաղաղապահի կարգավիճակ, և նրանք պետք է լինեն միջազգային խաղաղապահներ»,- նշեց Պապյանը։
Պապյանի դիտարկմամբ՝ շատ կարևոր է, որ Մինսկի խումբը և համաշխարհային այլ տերություններ ուշադրություն դարձնեն, որ Ալիևի կողմից տեղի է ունեցել միջազգային իրավունքի ոտնահարում: «Բոլոր բանակցությունների ընթացքում Ադրբեջանը պարտավորվել է չօգտագործել ուժի կիրառում կամ ուժի կիրառման սպառնալիք, այնինչ, նախորդ տարվա սեպտեմբեր-նոյեմբերին Արցախում տեղի ունեցածը սեփական պարտավորությունների ոտնահարում էր։ Հետևաբար, եռանախագահները պիտի հարուցեն համապատասխան հետաքննություն՝ և՛ Ալիևի գործունեության, և Ադրբեջանի կողմից կիրառվող զենքերի մասով»,- հավելեց Պապյանը։
Մանրամասները՝ տեսանյութում:
