Մենք պառլամենտական երկի՞ր ենք, էս ի՞նչ զավեշտ է․ Սերժ Սարգսյանը կրակի մեջ գցեց բոլորիս․ Բագրատ Ասատրյան․ ՏԵՍԱՆՅՈՒԹ

Factor TV-ի հարցազրույցը Հայ Ազգային կոնգրեսի պատգամավորության թեկնածու, ՀՀ ԿԲ նախկին նախագահ Բագրատ Ասատրյանի հետ

-Գնաճի այսպիսի պայմաններում ինչպե՞ս անել, որ աղքատներն ավելի չաղքատանան։

-Գնաճի պատճառները բազմաբնույթ են, բազմաթիվ են։ Այս իրավիճակում ավելի շատ դրսի՝ միջազգային շուկաներում տեղի ունեցող իրադարձությունների պատճառով են և դրամի արժեզրկման պատճառով։ Բայց դա այն իրավիճակն է, որում գործում են այս իշխանությունները, և պետք է դեղատոմսեր առաջարկեն՝ այս իրավիճակից ելնելով։

Էլի պետք է գանք ընտրություններին, նախընտրական փուլին։ Հիմնական ուժերը, որոնք հավակնում են իշխանության գալուն, մեծ խոստումներ են բաժանում, սոցիալական լուրջ խոստումներ են տալիս, որոնք իրենց հետևից, բնականաբար, պետք է գնաճի բերեն։ Չեմ ուզում գնահատական տալ, ուզում եմ ասել, որ այս գնաճային միջավայրը վտանգված է, և նոր սպառնալիքներ կան՝ ի դեմս այն խոստումների, որ տրվում են նախընտրական փուլում։

–Նախընտրական ծրագրերում ուժերից մեկը խոստանում է 3 մլրդ դոլարի ներդրումներ մեկ տարում, մյուսը՝ նույնքան հինգ տարում։ Ձեր գնահատականն ինչպիսի՞ն է այս թվերի վերաբերյալ։

-Ես պետք է վրդովեցնեմ։ Չեմ կարծում, թե լուրջ են այդ մոտեցումները, այդ գնահատականները։ Եթե խոսքն ուղղակի օտարերկրյա ներդրումների մասին է, այստեղ մեծ սպասելիքներ չպետք է ունենանք։ Այո՛, Հայաստանն այսօր զրոյական վիճակում է, բայց զրոյական վիճակում է ոչ միայն պատերազմի և Քովիդի պատճառով։ Սա համակարգային խնդիր է։ Ուղղակի ներդրումների հոսքը կրճատվում է վերջին 5-7 տարիների ընթացքում։ Եվ մենք հասել ենք այս վիճակին՝ անկախ պատերազմից, անկախ Քովիդից, անկախ այս գործոններից՝ աղբյուրը չորացել էր։

Հիմա ակնհայտ է, որ պատերազմը, նոր իրողություններն ավելի վատթարացնելու են իրավիճակը։ Եվ այստեղ անլուրջ եմ համարում գոնե առաջիկա երեք տարիների ընթացքում ծավալուն ներդրումների մասին խոսելը։

–Դուք ասացիք, որ ծրագրային առումով շատ մոտ են քաղաքական ուժերը։ Հիմա մարդկանց, գործիչների առումով ո՞ւմ հետ եք տեսնում համագործակցությունը խորհրդարանում։

-Ոչ մեկի հետ։ Ես այդպիսի խնդիր չեմ դնում՝ որևէ մեկի հետ համագործակցել։ Ես ասում եմ՝ եկեք ահա այս խնդիրների շուրջ համագործակցենք։

Հայաստանը, մեր տիպի երկրները շատ հեռու են պառլամենտարիզմից։ Սա այն արհեստական լուծումն է, որ Սերժ Սարգսյանն իր քաղաքական ապագան երկարացնելու համար արեց, կրակի մեջ է գցել բոլորիս։ Մենք պառլամենտական երկի՞ր ենք, էս ի՞նչ զավեշտ է։ Մենք ունենք վարչապետ, որ այո՛, ընտրված էր։ Պառլամենտը մի գործառույթ է իրականացնել՝ ընտրությունն է եղել։ Դրանից հետո պառլամենտը ոչ մի ազդեցություն հասարակության մեջ չունի։

Հարցազրույցը ամբողջությամբ՝ տեսանյութում։

Գարիկ Հարությունյան