27.11.2024 | 22:27
Հայաստանի մի շարք հասցեներում էլեկտրաէներգիայի անջատումներ կլինեն
Էրդողանը պատրաստվում է Բայդենի հետ քննարկել ԱՄՆ կողմից Հայոց ցեղասպանության ճանաչման հարցը․ Բրյուսելում մեկնարկում է ՆԱՏՕ-ի գագաթնաժողովը
Քաղաքականություն
14.06.2021 | 11:01
Բրյուսելում այսօր մեկնարկում է ՆԱՏՕ-ի անդամ երկրների գագաթնաժողովը։ Օրակարգում Ռուսաստանն ու Չինաստանն են, ինչպես նաև կիբերսպառնալիքներին հակազդումը, գրում է BBC-ի ռուսական ծառայությունը:
Նշվում է, որ ԱՄՆ նախագահ Ջո Բայդենը դաշինքից իր գործընկերների հետ հանդիպումների ժամանակ կքննարկի Ժնևում կայանալիք ՌԴ նախագահի հետ հանդիպումը։
Հիշեցնենք, որ այս գագաթնաժողովի շրջանակներում կայանալու է նաև Ջո Բայդենի հանդիպումը Թուրքիայի նախագահ Թայիփ Էրդողանի հետ, որի ընթացքում մի շարք հիմնախնդիրների հետ մեկտեղ կքննարկի նաև Լեռնային Ղարաբաղի հիմնահարցը: Դրա մասին տեղեկացրել է ԱՄՆ-ի նախագահի ազգային անվտանգության հարցերով խորհրդական Ջեյք Սալիվանը հունիսի 7-ին Սպիտակ տանը տեղի ունեցած մամլո ասուլիսի ընթացքում։
«Ինչ վերաբերում է նախագահ Էրդողանին, ապա Բայդենն ու Էրդողանը երկկողմ հանդիպում կունենան Բրյուսելում ՆԱՏՕ-ի գագաթնաժողովի շրջանակներում, ուր առկա է ընդարձակ օրակարգ բազմաթիվ հարցերով՝ կապված Արևելյան Միջերկրածովի, Սիրիայի, Իրանի, Լեռնային Ղարաբաղի հետ, ինչպես նաև այն դերի, որը Թուրքիան կշարունակի խաղալ Աֆղանստանում դիվանագիտության և բանակցությունների ոլորտում»,- ասել էր նա։
Reuters լրատվականի հաղորդմամբ էլ՝ Թուրքիայի նախագահ Թայիփ Էրդողանը հայտարարել է, որ Բայդենի հետ հանդիպման ժամանակ բարձրացնելու է նաև ԱՄՆ կողմից Հայոց ցեղասպանության ճանաչման հարցը։
«Դաշնակից երկրի նման դիրքորոշումը մի հարցի շուրջ, որը ՆԱՏՕ-ի հետ որևէ առնչություն չունի՝ հայերի հետ կապված հարցը, անհանգստացրել և հիասթափեցրել է մեզ: Հնարավոր չէ շարունակել՝ առանց հիշեցնելու այդ մասին», – ասել է Թուրքիայի նախագահը:
Տաթև Ֆռանգյան
