02.03.2026 | 17:54
Ամերիկացի զինծառայողների շրջանում զոհերի թիվը հասել է 4-ի. CENTCOM
Անկարայի արձագանքը՝ Հոլանդիայի խորհրդարանի կողմից Ցեղասպանության վերաբերյալ օրինագծերի ընդունմանը
Քաղաքականություն
23.02.2018 | 11:50
Թուրքիայի արտաքին գործերի նախարարությունը արձագանքել է Նիդեռլանդների խորհրդարանի կողմից Հայոց ցեղասպանության մասին 2 բանաձևերի ընդունմանը. փոխանցում է EH-ն:
«Մենք խստորեն դատապարտում ենք Նիդեռլանդների խորհրդարանի՝ 1915 թվականի դեպքերը որպես ցեղասպանություն ճանաչելու մասին որոշումները: Եվրոպայի կենտրոնում՝ Սերեբրենիցայում իրագործված ցեղասպանության վրա աչք փակող երկրի կողմից ընդունված այս անհիմն որոշումները կապ չունեն ոչ պատմության, ոչ էլ արդարության հետ:
Այս որոշումները ոչ մի իրավական ուժ չունեն։ Եվրոպայի մարդու իրավունքների դատարանի որոշումները ցույց են տալիս այս հարցում մեր իրավացիությունը»,- ասվում է Թուրքիայի արտգործնախարարության հայտարարության մեջ։
Հիշեցնենք, որ Նիդեռլանդների խորհրդարանի ստորին պալատը քվեների մեծամասնությամբ (142 կողմ, դեմ՝3) ընդունել է Օսմանյան Թուրքիայում 1915 թվականի հայերի զանգվածային սպանդը որպես ցեղասպանություն ճանաչելու երկու օրինագիծ:
Ըստ առաջինի՝ Հոլանդիան վերահաստատել է Հայոց ցեղասպանությունը ճանաչելու 2004 թվականի որոշումը, ըստ երկրորդի, այս տարվա ապրիլի 24-ին, ապա հինգ տարին մեկ Երևան է գործուղվելու Նիդեռլանդների կառավարության ներկայացուցիչն, ով մասնակցելու է Հայոց Եղեռնի զոհերի ոգեկոչման արարողություններին:
