Ո՛չ Սերժն էր լավ, ո՛չ Ռոբերտը, ո՛չ առավել ևս՝ Նիկոլը. ոչ ոք Արցախի անկախությունը չճանաչեց. հադրութցի. ՏԵՍԱՆՅՈՒԹ

Հադրութի շրջանից տեղահանված բնակիչները բողոքի ակցիա են իրականացնում ՀՀ արտաքին գերծերի նախարարության շենքի դիմաց։

«Մենք տեղեկացել ենք, որ ՌԴ արտգործնախարար Լավրովը այցելում է Հայաստան: Նամակ ենք հանձնելու ԱԳ նախարարին, որպեսզի առաջիկա շաբաթվա ընթացքում մեզ ընդունի։ Մենք պետք է իմանանք մեր գլխի գալիքը»,- լրագրողների հետ զրույցում ասաց տեղահանված հադրութցի Լևոն Հայիրյանը՝ հավելելով, որ խիստ մտահոգություններ ունեն:

Նրա խոսքով՝ ռուսները հայտարարում են, որ Արցախը Ադրբեջան է, իսկ Ֆրանսիան, ԱՄՆ-ն հույս են տալիս, որ բանակցությունները շարունակվում են։

«Բոլորը հետաքրքրվում են Արցախով, բացի՝ Հայաստանի և Արցախի իշխանություններից։ Էս ազգի մեջ մի քաղաքական գործիչ չկա՞, որ վեր կենա ու ասի՝ Արցախը Ադրբեջան չի, պարոն ռուսներ, չի եղել ու չի լինելու։ Պետք է պաշտոնապես հայտարարեն, որ մենք էլ իմանանք՝ ինչ ենք անելու: Մենք ուզում ենք վերադառնալ Հադրութ», – ասաց հադրութցին՝ հավելելով, որ որևէ այլ տեղում, բացի Հադրութից, ապրել չեն ուզում։

«Այստեղ կամ Ստեփանակերտում նստելու ենք այնքան ժամանակ, մինչև մեր հայրենիքը վերադարձնեն։ Ցավոք, մեր իշխանությունների կողմից արվող քայլերն անբավարար են»,- ընդգծեց տեղահանված հադրութցին:

Նրա խոսքով՝ Հայաստանի իշխանությունները երբեք չեն մտածել պետություն կառուցելու մասին, իսկ Արցախի իշխանությունները միշտ եղել են Հայաստանի իշխանությունների կամակատարը:

«Ո՛չ Սերժն էր լավ, ո՛չ Ռոբերտը, ո՛չ Լևոնը, ոչ էլ առավել ևս՝ Նիկոլը. ոչ ոք Արցախի անկախությունը չճանաչեց»,- նշեց հադրութցին` ընդգծելով, որ Արցախի կարգավիճակի հարցն առաջնային է:

Մանրամասները՝ տեսանյութում: